Inspektorati Policor i Kosovës (IPK), përmes Departamentit të Hetimeve, ka rekomanduar Policisë së Kosovës suspendimin e katër zyrtarëve policorë që shërbenin në Stacionin Policor të Podujevës.
Sipas njoftimit, IPK kishte pranuar informacione fillestare nga Policia e Kosovës se zyrtarët e përfshirë dyshohen për tejkalim të autorizimeve gjatë përdorimit të forcës.
Nga hetimet e para dyshohet se katër policët, gjatë ushtrimit të detyrës dhe brenda ambienteve të stacionit policor, kanë keqtrajtuar dy qytetarë – prej të cilëve njëri është i mitur – të ndaluar në stacion.
Rasti po hetohet në bashkëpunim me Prokurorinë Themelore të Prishtinës, në procedurë të rregullt, me dyshimin për veprën penale “Keqtrajtim gjatë ushtrimit të detyrës zyrtare ose autorizimeve publike.”
Hetuesit e IPK-së, në konsultim të vazhdueshëm me prokurorinë, do të ndërmarrin veprime shtesë hetimore për të sqaruar plotësisht rrethanat e rastit.
- Advertisement -
