Kompania Rajonale e Ujësjellësit Hidrodrini SH.A ka njoftuar për një problem teknik të paraqitur në pajisjet për klorimin me gaz në Burimin e Istogut.
Sipas komunikatës zyrtare, është evidentuar një defekt në sistemin e klorit të gaztë, i cili ka rezultuar me emetim të klorit në ajër. Megjithatë, kompania siguron se nuk ka asnjë rrezik për qytetarët apo për cilësinë e ujit të pijshëm në këtë komunë.
Flamur Arifaj, Menaxher i Njësisë Operative në Istog, ka deklaruar se situata është nën kontroll dhe po punohet për riparimin e pajisjeve
“Uji i pijshëm është testuar në dy lokacione të ndryshme dhe rezultatet kanë dalë brenda vlerave të lejuara. Nuk ka vend për panik. Situata është nën kontroll dhe po punohet për riparimin e pajisjeve.”, ka thënë Arifaj.
Në lidhje me këtë ka reaguar edhe Komuna e Istogut, ku bëri të ditur se defekti është identifikuar dhe riparuar menjëherë nga ekipet kompetente. Uji i pijshëm nga burimi i Istogut është i pastër dhe i sigurt për konsum, ndërsa furnizimi me ujë po vazhdon normalisht./IndeksOnline/
