Projekti i Komunës së Pejës për ndërtimin e “Bulevardit të gjelbër” nga udhëkryqi në hyrje të Pejës, që njihet si “Te rampa”, e deri te rrethrrotullimi nën stacion të autobusëve nuk mund të vazhdojë pa pëlqimin e Hekurudhave të Kosovës.
Javën e kaluar komuna ka nisur spastrimin e hapësirës për përgatitjen e terrenit për nisjen e realizmit të këtij projekti në vlerë prej rreth 1.3 milion eurosh, që po financohet nga Ministria e Infrastrukturës, shkruan sot “Koha Ditore”.
Në atë hapësirë kanë qenë të ndërtuara ilegalisht mbi 10 objekte të ndryshme për afarizëm dhe pronarëve të tyre komuna u kishte dhënë 15 ditë afat që vetë t’i rrënojnë.
Përveç një pompe të vogël të derivateve, e cila është e rrethuar nga Inspektorati me shirit për pamundësi të shfrytëzimit, të gjitha të tjerat janë rrënuar dhe hapësirat po spastrohen nga vetë pronarët. Por, paraprakisht komuna nuk ka kërkuar leje nge Hekurudhat e Kosovës, ndaj zyrtarë të saj, thonë se ky projekt nuk mund të vazhdojë pa pëlqimin e tyre.
