Jemi mësuar që shpesh herë t’i shohim përkrahjet që u bëhen politikanëve, e zyrtarëve shtetërore madje në mënyrë publike.
Por dikush vendos që “tërthorazi” t’i përkrahë, e të shpërblehet.
Ngjashëm ndodhi së fundi edhe me gruan e frizerit të njohur në Prishtinë, e shumë i afërt me Lëvizjen Vetëvendosje.
Brikena Kelmendi-Gashi është gruaja e frizerit Armend Gashi apo njohur ndryshe si gruaja e Armend Gashit, i cili është përkujdesur që t’ia ndryshojë gjithë look-un ministres së Drejtësisë, Albulena Haxhiu e përkujdeset që t’ia rregullojë flokët çdoherë kryeministrit në detyrë, Albin Kurti.
Brikena Kelmendi Gashi ka përfituar 10 mijë euro nga Ministria e Kulturës Rinisë dhe Sportit, në kuadër të thirrjes për projekte kulturore për vitin 2025, transmeton lajmi.net.
Madje në listën e bërë publike nga MKRS shihet se ajo është renditur në vendin e parë në kategorinë e IV, për projektin e “Vnesht Festival 2”.
Brikena Kelmendi-Gashi është bërë emër i njohur për raportime të ngjashme.
Para dy viteve ishte bërë e ditur se gruaja e frizerit të afërt me VV-në, ishte emëruar në një pozitë pune në Ministrinë e Drejtësisë që udhëhiqet nga Albulena Haxhiu. Më saktë, ajo ishte punësuar në Divizionin për Mbrojtjen e të Akuzuarve nga Gjykata Speciale. Duke shkuar më tutje, Armend Gashi bashkëshorti i saj ishte punësuar në shkollën “Shtjefën Gjeqovi” në Prishtinë.
Këtë për mediat e kishte konfirmuar edhe vetë drejtori i kësaj shkolle, Blerim Gërvalla,
“Po, është punësuar gati që 6-7 muaj diçka…, si instruktor i profilit të floktarisë”, e kishte konfirmuar Gërvalla./Lajmi.net/
