Gjykata Themelore në Prishtinë u ka caktuar masën e arrestit shtëpiak 19 të dyshuarve, të cilët u arrestuan për dallavere me patentë shoferë të premten e kaluar.
Burime të Indeksonline tregojnë se gjykata u ka caktuar atyre arrest shtëpiak, duke përfshirë edhe Drejtoreshën e Departamentit për Patentë Shofer, Filize Krasniqi.
Ndryshe, të dielën gjykata kishte vendosur që të tërhiqet kërkesa për caktimin e paraburgimit ndaj të pandehurve: Shkëlqim Statovci, Haki Jashari, Liljana Bozhaniq dhe dhe Ava Kurteshi.
“Seanca dëgjimore lidhur me kërkesën e Prokurorisë për caktimin e paraburgimit për të pandehurit përfundoi. Gjatë kësaj seance Prokuroria ofroi dëshmitë të cilat i ka në dispozicion dhe pala mbrojtëse pretendimet e tyre. Në fund Prokurori u tërhiq nga kërkesa për caktimin e paraburgimit ndaj të pandehurve: Shkëlqim Statovci, Haki Jashari, Liljana Bozhaniq dhe dhe Ava Kurteshi”, kishte deklaruar Prokurori Ilaz Beqiri, shkruan Indeksonline.
Ndërsa, për 19 të arrestuarit e tjerë sot është vendosur për arrest shtëpiak.
Policia e Kosovës të premten arrestoi gjithsej 23 persona të dyshuar për ‘keqpërdorim të detyrës zyrtare’ dhe ‘marrje ryshfeti’. /Indeksonline/.
