Gjendet trupi i pilotit grek, ja kush është

Trupi i pilotit dhe pjesë të avionit u gjetën në brigjet verilindore të ishullit Skyros të Greqisë.

Sipas mediave greke, “piloti që u vra të enjten kur avioni i tij u rrëzua në Egjeun qendror, u identifikua nga Forca Ajrore Helenike si kapiteni Giorgos Baltadoros. Baltadoros ishte duke shërbyer në Skuadrën e Forcave Ajrore 331 në Tanagra.

Ministri Grek i Mbrojtjes Panos Kammenos njoftoi lajmin e zymtë për mediat sociale, duke shkruar:

“Një pilot grek është bashkuar me pantheonin e heronjve. Ai ra duke luftuar për mbrojtjen e sovranitetit tonë kombëtar dhe integritetin territorial. Atdheu përkulet [në sakrificën e tij] në zi. Ngushëllime të sinqerta familjes së tij dhe stafit të Forcave Ajrore Helenike “.

Mirage -2000  dhe një tjetër avion grek po ktheheshin në një bazë të forcave ajrore në Skyros pasi u përballën me aeroplanët turq që kishin shkelur hapësirën ajrore greke.

Forca ajrore e Greqisë konfirmoi në një deklaratë se ngjarja ka ndodhur në orën 12:15.

Gazeta turke Milliyet raporton se forcat e armatosura turke kanë mohuar se ndonjë prej avionëve të saj ishte në zonë në kohën e rrëzimit.

Aeroplani, një Mirage 2000-5 prodhim francez, është një nga avionët luftarakë më modernë në inventarin e Forcave Ajrore Helenike.

Pesëmbëdhjetë aeroplanë  M2000-5 u morën nga Franca.

Mediet turke nxituan të raportojnë se aksidenti nuk kishte të bënte me ndonjë sulm nga avionët apo anijet turke në zonë, ndërsa grekët theksojnë faktin se avionët ishin shumë ulët dhe kjo mund të ketë sjellë aksidentin.

“Avionët po fluturonin në 800-900 metër lartësi dhe kjo cilësohet problematike për pilotët që fluturojnë në Egje sepse avioni futet në një vorbull ajri të ngrohtë, një fenomen tipik për këtë det duke bërë që të humbasë ekuilibrin. Me shumë mundësi, piloti nuk ka mundur të reagojë në kohë për shkak të lartësisë së ulët”, raporton Zougla.gr, duke iu referuar burimeve ushtarake.