Rrethanat e vdekjes së të paraburgosurit Naser Makolli në burgun e Lipjanit nuk janë qartësuar ende ndërkohë që pritet të bëhet obduksioni.
Drejtori i Institutit të Mjekësisë Ligjore, Arsim Gërxhaliu tha se trupi është pranuar rreth orës 15:00 në këtë institut.
“Trupi është pranuar sot rreth 15 ne IML, ndërsa nesër do të bëhet obduksioni”, tha Gërxhaliu mbrëmë për KALLXO.com.
Ministria e Drejtësisë nuk ka dhënë ende detaje për rrethanat e vdekjes së Naser Makollit, i cili po gjendej në paraburgim në Lipjan si i dyshuar për një vrasje të rëndë të vitit të kaluar ndërsa zyrtarë e aktivistë të Lëvizjes Vetëvendosje kanë ngritur dyshime për faktin se Makolli thuhet që ka qenë personi i parë që e ka vërejtur Astrit Deharin të plagosur në qelinë e tij në qendrën e paraburgimit në Prizren, në nëntor të vitit të kaluar.
