Sot, përfaqësues të Federatës së Futbollit të Kosovës zhvilluan një takim konstruktiv me ministrin e ri të Sportit, Blerim Gashani. Në takim morën pjesë nënkryetari i FFK-së, Agim Dibrani, si dhe anëtari i Komitetit Ekzekutiv, Samir Ujkani.
Gjatë takimit, përfaqësuesit e FFK-së e uruan ministrin Gashani për detyrën e re, duke theksuar se është një zhvillim pozitiv për sportin që në krye të këtij dikasteri tashmë është një ish-futbollist dhe një njohës i mirë i futbollit.
Në këtë takim u diskutua për rrugëtimin dhe zhvillimin e Federatës së Futbollit të Kosovës, organizimin e garave vendore, si dhe për punën dhe përfaqësimin e ekipeve kombëtare të Kosovës. Nga ana e FFK-së u shpreh gatishmëria për bashkëpunim të vazhdueshëm me institucionet shtetërore, duke theksuar rëndësinë e futbollit si një mjet i rëndësishëm për promovimin e shtetit në arenën ndërkombëtare.
Ministri Gashani shprehu kënaqësinë për takimin dhe vlerësoi punën e Federatës, duke përgëzuar për performancën dhe sukseset e arritura. Ai theksoi se për të sporti nuk është vetëm obligim institucional, por edhe një pasion i veçantë, duke garantuar se bashkëpunimi me Federatën e Futbollit të Kosovës do të vazhdojë dhe do të forcohet edhe më tej.
