Gazeta Blic e ka siguruar draftin e konkluzioneve që pritet të dalin nga takimi i liderëve të vendeve të Ballkanit Perëndimor nga Samiti i Berlinit.
Sipas këtij drafti, Merkel dhe Macron kanë vendosur vija të kuqe sa i përket idesë së shkēmbimit të territoreve.
Sipas këtij drafti kërkohet arritja e një marrëveshje, që do ta ruante stabilitetin në Ballkan, duke i rënë vijë të kuqe idesë së shkëmbimit të territoreve të mbështetur nga presidenti i Kosovës, Hashim Thaçi dhe ai serb, Aleksander Vuçiq.
”Ata nënvijëzuan nevojën e arritjes së një marrëveshjeje për normalizimin e marrëdhënieve mes Kosovës dhe Serbisë për stabilitet në rajon dhe për perspektiven evropiane të Kosovës dhe Serbisë. Ata ranë dakord që çfarëdo marrëveshje e tillë duhet të jetë gjithëpërfshirëse, e qëndrueshme politikisht dhe të kontribuojë në stabilitetin rajonal.
Serbia dhe Kosova u dakorduan që të përshpejtojnë përpjekjet që t’i implementojnë marrëveshjet ekzistuese dhe të ri-angazhohen në mënyrë konstruktive në normalizimin e dialogut me ndërmjetësimin e BE-së me qëllim që të arrijnë marrëveshje gjithëpërfshirëse dhe përfundimtare”, thuhet ndër të tjera në këtë draft të konkluzioneve që pritet të dalin nesër.
Për më shumë Gazeta Blic ja u sjell të plotë Draft Konkluzionin nga takimi i liderëve të vendeve të Ballkanit Perëndimor.
