Krahas Llapit edhe Feronikeli është pro heqjes së nenit 22 të Propozicioneve të Garave.
Është kryetari i kampionit në fuqi, Ekrem Elshani, që ka konfirmuar kërkesën.
Neni 22 obligonte klubet të aktivizonin një lojtar nën 20 vjet titullar dhe një tjetër rezerv.
“Sa i përket kërkesës së Llapit, ne e përkrahim, dhe në të njëjtën kohë edhe ne kemi bërë të njëjtën kërkesë me e hequr këtë rregull, sepse po na dëmton shumë. Ne jemi për mi përkrah talentët, por jo me na imponuar inkuadrimin në lojë, sepse po dëmtohet klubi, edhe po dekorajohen talentët sepse pass 5 minutave po duhet me i zëvendësuar”, tha Elshani për Gazetën Olle.
“Ky nuk është stimulim i talentit, por zhgënjim. Nëse ka raste ku lojtari e meriton me luajtur edhe nën këtë moshë, ne do t’i japim përparësi, por ne jemi me hequr këtë rregull, sepse kjo nuk aplikohet askund në ligat evropiane”, shtoi i pari i Feronikelit.
Për dallim nga Llapi e Feronikeli, Liria ka dalë kundër heqjes së këtij neni.
