Ish-asamblisti i Kuvendit Komunal të Drenasit, Xhavit Drenori, në FRONTAL të T7, ka folur për shumë afera të ndryshme korruptive të cilat ndodhin në Komunën që udhëhiqet nga Ramiz Lladrovci, e të cilët nuk ndiqen nga Prokuroria edhe përkundër denoncimit.
Ai ka treguar se si në një rast është shndërruar në ‘hetues’, duke e hulumtuar një aferë korruptive që ka pasur të bëjë me furnizimin e një shkolle me antifriz.
Ai ka thënë se ka hyrë ilegalisht brenda shkollës për të marrë mostrat e antifrizit, dhe më pas ka zbuluar se ishte mashtruar edhe me cilësinë dhe me sasinë e tij.
“Në vitin 2016 kam marrë informacione që është keqpërdorur me paranë publike në një shkollë fillore. Kam hy ilegalisht në shkollë për me i marrë mostrat e antifrizit, dhe kam zbuluar që është vjedhur edhe në sasi por edhe në cilësi”, ka thënë Drenori, shkruan Gazeta Express.
Ai ka treguar se më pas është intervistuar nga Policia e Kosovës për hyrjen ilegale në shkollë.
“Pas kësaj unë jam intervistuar nga Policia, për faktin se kam hyrë fshehtas në shkollë. Por unë iu kam thanë që e kam zbuluar një keqpërdorim me mijëra euro”, ka shtur ndër të tjera Drenori.
Drenori ka drejtuar kritika edhe ndaj prokurorisë, pasi sipas tij, askush nuk është marrë me denoncimet që i ka dërguar në Prokurori, e të cilat kanë të bëjnë me keqpërdorime të miliona eurove./GazetaExpress/
