Dominic Calvert-Lewin është pa klub që nga largimi nga Evertoni në qershor.
Ish-sulmuesi i Evertonit ka shkarkuar agjentin e tij teksa vazhdon të kërkojë një skuadër të re, raporton The Sun.
Calvert-Lewin u largua nga Evertoni në fund të kontratës së tij pas gati nëntë vitesh në klub. Ai shënoi 71 gola në të gjitha garat për “The Toffees” dhe në një periudhë ishte ndër sulmuesit më të mirë të Premier Ligës, por vitet e fundit ka vuajtur gjithnjë e më shumë nga lëndimet.
28-vjeçari bëri 26 paraqitje në Premier Ligë sezonin e kaluar, por humbi gati tre muaj për shkak të një lëndimi muskulor dhe shënoi vetëm tre gola. Megjithatë, ai është lidhur me lëvizje te West Ham, Aston Villa dhe madje edhe Manchester United.
Klubet e Premier Ligës mund të nënshkruajnë dhe regjistrojnë lojtarë të lirë edhe jashtë afatit kalimtar, por Calvert-Lewin me siguri do të dëshirojë që e ardhmja e tij të vendoset para 1 shtatorit.
Sipas gazetarit Alan Nixon, sulmuesi ka vendosur të ndahet me përfaqësuesin e tij dhe të marrë vetë kontrollin e negociatave për një transferim të mundshëm. Thuhet se ai ende shpreson për një kalim te Manchester United, ndonëse klubi konfirmoi të shtunën transferimin prej 73.7 milionë funtesh të Benjamin Sesko nga RB Leipzig.
Një avantazh për Calvert-Lewin mund të jetë statusi i tij si lojtar vendas (homegrown), sidomos duke marrë parasysh interesimin e AC Milan për huazimin e sulmuesit të United, Rasmus Hojlund.
Sipas The Athletic, skuadra e Ruben Amorim është e gatshme ta shesë Hojlund për rreth 30 milionë funte, por mund të pranojë edhe një huazim nëse nuk arrihet kjo shifër.
Duket se ish-ylli i Evertonit po pret për një lëvizje drejt Old Trafford, me talkSPORT që raportoi të martën se ai ka refuzuar një ofertë “ambicioze” nga Sunderland.
Ai raportohet gjithashtu se ka zhvilluar bisedime edhe me Leeds, por skuadra e Daniel Farke është tërhequr nga negociatat për shkak të kërkesave të larta të pagës së lojtarit.
Evertoni e ka zëvendësuar Calvert-Lewin duke nënshkruar me Thierno Barry nga Villarreal për 27 milionë funte. /GazetaExpress/
