Në një intervistë për lajmi.net, Deliu-Kodra ka thënë se dalja më e vogël e qytetarëve në këto zgjedhje ndërlidhet me këtë çështje dhe me mandatin e cunguar afër njëvjeçar, që do ta ketë kryetari i ri.
“Fitues të këtyre zgjedhjeve janë vetë qytetarët e Drenasit të cilët edhe kësaj radhe rikonfirmuan mbështetjen e tyre për programin e PDK-së, duke e radhitur si subjektin e parë më të votuar në Drenas. Partia Demokratike dhe kandidati i saj janë fitues të këtyre zgjedhjeve, edhe pse ne kemi balotazh”, ka thënë Deliu-Kodra.
Sipas saj, PDK-së në Drenas nuk i është shpërndarë asnjë votë tek subjektet e tjera politike, por atë e ka dëmtuar vetëm pjesëmarrja më e vogël e qytetarëve në zgjedhje dhe votat e kandidatit të pavarur, i cili ka qenë asamblist i PDK-së.
“Në nivel vendi, PDK-ja e ka po atë elektorat që e ka pasur në Drenas dhe numrin e njëjtë të votuesve”, ka thënë Deliu-Kodra, transmeton lajmi.net.
Fitorja e PDK-së më 18 dhjetor, për deputeten e PDK-së që vjen nga kjo anë, do të jetë fitore vetëm e qytetarëve të Drenasit dhe vazhdim i ndryshimeve pozitive të cilat kanë ndryshuar jetën e qytetarëve të kësaj ane.
“U jemi mirënjohës të përhershëm qytetarëve për besimin e dhënë dhe i garantojmë se vota e tyre do të përkthehet në projekte konkrete për drenicakët”, ka thënë Deliu-Kodra.
Deputetja e PDK-së, Blerta Deliu-Kodra, ka thënë se do ta intensifikojnë komunikimin e mirëfilltë me qytetarë, sepse sipas saj, votuesit e PDK-së në Drenas janë stabil dhe e ruajnë mbështetjen e tyre për PDK-në.
“Këtë ua kemi borxh mbështetësve, gjeneratave të tëra që e ruajnë me fanatizëm mbështetjen e tyre për PDK-në”, ka thënë Deliu-Kodra.
Raundi i balotazhit, sipas deputetes së PDK-së, është raund i përqendrimit të punës së tyre aty ku buron fryma e çlirimit, aty ku Partia Demokratike ka lindur.
