Çitaku: Kurti tha “Qeverinë e bëj vetë, Kuvendin e bëj vetë, hajde ta bëjmë presidentin”
Sekretarja e Përgjithshme e PDK-së, Vlora Çitaku, ka deklaruar se takimi ndërmjet Bedri Hamzës dhe Albin Kurtit nuk ka prodhuar asnjë rezultat konkret, pasi siç thotë ajo në emisionin Rubikon, nuk ka pasur hapësirë reale për diskutim mbi çështjet politike.
Sipas saj, PDK-ja nuk ka shkuar në takim për të negociuar poste, por për të diskutuar parimet se si do të dukej Kosova në katër vitet e ardhshme.
“Është tmerruese se si synohet të reduktohet çështja e zgjedhjes së presidentit në një vend pune. Ne nuk po shkojmë për të negociuar për ta bërë dikë president. Kjo do të ishte reduktim deri në banalitet i zyrës së presidentit dhe i funksionimit demokratik. Ne nuk kemi shkuar në takim për të diskutuar për një vend pune, por për parimet, se si do të duket Kosova në katër vitet e ardhshme”, është shprehur Çitaku.
Ajo ka bërë të ditur se takimi që kishte Bedri Hamza me Albin Kurtin, nuk solli asnjë zhvillim të ri mes palëve.
Lexo edheHaradinaj: Jam i gatshëm të pranojë që të kandidohem nga opozita për president, jo në marrëveshje me VV-në
“Nuk ka pasur asnjë lloj hapësire për të diskutuar. Do të doja të kisha diçka ekskluzive, substanciale e domethënëse për të shpalosur, por nuk ka. Ka qenë një deja vu i takimeve të mëhershme, madje mund të them se ka pasur edhe kthim prapa në atë që mund të quhej ofertë. U tha: ‘Qeverinë e bëj vetë, Kuvendin e bëj vetë, po hajde ta bëjmë presidentin’”, deklaroi Çitaku në Rubikon.
