Çmimet e naftës në tregjet botërore javën e kaluar kanë rënë dukshëm, pasi që presidenti amerikan Donald Trump kërkoi nga OPEC-u të ulë çmimet dhe njëkohësisht paralajmëroi rritje të prodhimit të naftës në SHBA.
Çmimi i një fuçie në tregun londinez javën e kaluar ra për 2,8 për qind, në 78,50 dollarë, ndërsa në tregun amerikan fuçia ra për 4,1 për qind, në 74,66 dollarë.
Por kjo rënie e çmimeve në tregjet ndërkombëtare, nuk është reflektuar dhe në çmimet e derivatëve të naftës në Kosovë.
Në Kosovë çmimet e derivateve të naftës vazhdojnë të jenë të njëjta. Çmimet e derivateve në tregun kosovar vazhdojnë të sillen përafërsisht 1.25 deri 1.30 cent dieseli. Ndërkaq benzina nga 1.26 cent deri 1.31 cent.
Kryetari i Shoqatës së Naftëtarëve të Kosovës Fadil Berjani ka thënë për “Indeksonline”, se çmimet tek ne nuk kanë lëvizur dhe se çmimet e derivateve në Kosovë janë të njëjta që dy muaj. Por megjithatë thotë se Kosova vazhdon t’i ketë çmimet më të ulta në regjion.
Berjani thotë se me ardhjen në pushtet të presidentit Donald Trump, do të ketë zbritje të çmimit të derivateve në tërë globin.
“Këto janë çmimet aktuale në tregun kosovar, janë mbi dy muaj. Kemi pas lëvizje të lehta në berza ndërkombëtare, po te ne çmimi me pakicë nuk ka pasur lëvizje. Për qytetarin tonë çmimi real kishte me qenë 1 euro. Por ketë nuk e përcakton as shoqata dhe as qeveria. Çmimin e përcakton berza dhe organizata prodhuese OPEC. Qytetarët tanë janë duke u shërbyer me çmimet më të lira në regjion. Çfarë çmimi do të kemi në ditët në vijim, s’mundemi me paragjyku, shkaku se po ka lëvizje të mëdha në tregjet ndërkombëtare. Ardhja ne pushtet e presidentit Tramp me siguri se do te ketë zbritje të derivateve në terë globin”, tha Berjani.
Ndryshe çmimi në Shqipëri për Dieseli është 1.89 cent dhe benzina 1.90 cent. Ndërkaq në Serbi Dieseli është 1.78 cent dhe benzina 1.79 cent.