Policia e Kosovës, në bashkëpunim me Doganën e Kosovës, ka zbuluar dhe sekuestruar mbi 30 mijë euro mjete monetare të padeklaruara në Pikën Kufitare të Bërnjakut.
Sipas njoftimit zyrtar, rasti ka ndodhur më 8 qershor 2026, kur njësitë policore të Stacionit Policor Kufitar Bërnjak, në kuadër të angazhimeve për parandalimin e aktiviteteve të kundërligjshme ndërkufitare, kanë ndaluar për kontroll të detajuar një veturë me targa serbe.
Automjeti drejtohej nga një shtetas serb, ndërsa gjatë kontrollit të drejtuesit dhe pasagjerit, në çantën e pasagjerit janë gjetur mjete monetare të padeklaruara.
Policia ka bërë të ditur se janë hasur 25.515 euro para të gatshme, si dhe dinarë serbë në vlerë prej 4.813 eurosh, duke e çuar shumën totale të mjeteve monetare të gjetura në 30.328 euro.
Lidhur me rastin janë ndërmarrë të gjitha veprimet procedurale, ndërsa rasti i është përcjellë Doganës së Kosovës për trajtim të mëtejmë në përputhje me legjislacionin në fuqi./IndeksOnline/
