Arabia Saudite paralajmëron përgjigje të ashpër ndaj sulmeve të Huthëve, rritet tensioni në rajon
Arabia Saudite ka paralajmëruar një përgjigje të fortë ndaj sulmeve të lëvizjes Huthi të Jemenit, e mbështetur nga Irani, të cilat kanë shënjestruar aeroportet dhe objektet e naftës dhe gazit në vend. Sulmet e fundit kanë shkaktuar viktima dhe kanë rritur tensionet në rajon.
“Ngjarjet e javëve të fundit janë serioze. Përgjigjja jonë duhet të jetë po aq serioze”, deklaroi ministri saudit i Energjisë, princi Abdul Aziz bin Salman, gjatë Kongresit Botëror të Energjisë në Riad.
Të dielën, një shtetas pakistanez humbi jetën pasi një predhë goditi Terminalin 4 të Aeroportit Ndërkombëtar King Khalid në kryeqytetin saudit. Ngjarja ndodhi një ditë pasi një sulm me raketa ndaj Terminalit 3 shkaktoi 13 viktima dhe detyroi mbylljen e tij.
Mes viktimave të sulmit të së shtunës kishte shtetas sauditë, bangladeshas, amerikanë dhe qytetarë të disa vendeve të tjera. Ndërkohë, autoritetet saudite njoftuan se edhe Aeroporti Ndërkombëtar King Fahd, në qytetin e Dammamit, u sulmua të dielën në mbrëmje, por pa shkaktuar viktima.
Huthitë kanë marrë përgjegjësinë për sulmet, duke deklaruar se ato janë kryer në shenjë hakmarrjeje për bombardimet saudite në zonat e Jemenit që ndodhen nën kontrollin e tyre. Zëdhënësi ushtarak i grupit, Yahya Sarea, tha se forcat e tij kishin lëshuar raketa dhe dronë drejt aeroporteve të Riadit dhe Dammamit, si dhe drejt dy objekteve të naftës dhe gazit në lindje të Arabisë Saudite.
Sipas tij, sulmet ishin përgjigje ndaj 124 bombardimeve ajrore saudite të kryera në Jemen gjatë 24 orëve të mëparshme. Huthitë kanë paralajmëruar gjithashtu se do të vazhdojnë sulmet derisa Arabia Saudite të ndalë operacionet ushtarake dhe të heqë kufizimet ndaj territoreve që ata kontrollojnë.
Nga ana tjetër, ministria e Shëndetësisë e drejtuar nga Huthitë njoftoi se një fëmijë u vra dhe gjashtë persona të tjerë u plagosën nga një sulm ajror saudit ndaj një banese në kryeqytetin jemenas, Sana.
Ministri saudit i Energjisë deklaroi se sulmet e fundit kanë vënë në provë infrastrukturën dhe sigurinë e vendit, por këmbënguli se Arabia Saudite do t’i kapërcejë këto sfida. Ai siguroi gjithashtu pjesëmarrësit në Kongresin Botëror të Energjisë se vendi mbetet i përkushtuar ndaj sigurisë së tyre.
Sulmet ndaj aeroportit të Riadit janë dënuar nga komuniteti ndërkombëtar. Sekretari i Përgjithshëm i Kombeve të Bashkuara, António Guterres, u shpreh se ishte thellësisht i tronditur dhe paralajmëroi se goditja e civilëve dhe e infrastrukturës civile përbën shkelje të së drejtës ndërkombëtare.
Lexo edheRepublikanët në Dhomën e Përfaqësuesve synojnë bllokimin e marrëveshjes së Trumpit për dizelin rus
Presidenti amerikan Donald Trump tha se do të marrë një vendim lidhur me mundësinë e përfshirjes së drejtpërdrejtë të SHBA-së në sulmet kundër Huthive. Ndërkohë, sipas raportimeve, ushtria amerikane po i ofron tashmë koalicionit të udhëhequr nga Arabia Saudite mbështetje me informacione inteligjence dhe identifikimin e objektivave.
Irani, i cili ka mohuar vazhdimisht akuzat për furnizimin e Huthive me armë dhe trajnim ushtarak, është shprehur i shqetësuar për përshkallëzimin e konfliktit dhe ka bërë thirrje për dialog.
Jemeni është përfshirë në një luftë civile që prej vitit 2014, kur Huthitë morën kontrollin e kryeqytetit, Sana, duke rrëzuar qeverinë nga pushteti. Konflikti u përshkallëzua një vit më vonë, kur një koalicion i udhëhequr nga Arabia Saudite ndërhyri ushtarakisht për të rikthyer qeverinë.
Situata është rënduar edhe më tej pas ofensivës së fundit të Huthive përgjatë bregdetit të Detit të Kuq, ku ata morën kontrollin e zonave pranë ngushticës strategjike Bab al-Mandab. Kjo rrugë ujore ka rëndësi të madhe për tregtinë ndërkombëtare dhe transportin e naftës.
Tensionet në këtë zonë kanë ndikuar edhe në tregjet ndërkombëtare të energjisë, duke kontribuar në rritjen e çmimeve të naftës. Arabia Saudite është mbështetur te rrugët detare të Detit të Kuq për eksportet e saj, pasi lufta mes SHBA-së, Izraelit dhe Iranit ka ndikuar rëndë në qarkullimin përmes Ngushticës së Hormuzit.
Ndërkohë, qeveria jemenase ka njoftuar nisjen e një ofensive të re për të rimarrë territoret nën kontrollin e Huthive. Forcat proqeveritare pretendojnë se kanë rimarrë disa zona pranë ngushticës Bab al-Mandab, me mbështetjen e sulmeve ajrore saudite, por Huthit i mohojnë këto pretendime.
Përshkallëzimi i luftimeve dhe sulmet ndaj infrastrukturës energjetike e aeroportuale shtojnë shqetësimet për sigurinë në rajon, ndërsa mbetet e paqartë se si do të zhvillohet situata në ditët në vijim.
