Altin Krasniqi, në 6-vjetorin e arrestimit të krerëve të UÇK-së: U dënuan për postet politike që bartën, nuk do t’i lëmë vetëm
Në gjashtëvjetorin e arrestimit të ish-krerëve të UÇK-së, deputeti i Partisë Demokratike të Kosovës, Altin Krasniqi, djali i Jakup Krasniqit, ka kundërshtuar nga foltorja e Kuvendit aktgjykimin ndaj tyre, duke e cilësuar atë si padrejtësi me pasoja afatgjata për Kosovën.
Në fjalimin e tij, Krasniqi tha se dënimi i Jakup Krasniqit, Hashim Thaçit, Kadri Veselit dhe Rexhep Selimit lidhet, sipas tij, me funksionet politike që kishin mbajtur dhe jo me përgjegjësi individuale të dëshmuara.
“Më 16 shtator 2026, nuk u dënuan Jakup Krasniqi, Hashim Thaçi, Kadri Veseli dhe Rexhep Selimi për veprimet e tyre apo për përgjegjësitë e tyre individuale. U dënuan për shkak të posteve politike që ata kishin bartur”, deklaroi ai.
Krasniqi argumentoi se mënyra e trajtimit të Drejtorisë Politike të UÇK-së në këtë proces synon, sipas tij, të cenojë objektivat e luftës çlirimtare.
“Kjo ka vetëm një arsye: duan t’i përlyejnë dhe baltosin objektivat e UÇK-së, objektivat e kësaj drejtorie politike, të cilat ishin të njëjta ndër breza: liria dhe pavarësia e Kosovës”, tha deputeti i PDK-së.
Ai paralajmëroi se vendet kundërshtare të pavarësisë së Kosovës mund ta përdorin aktgjykimin në fushatat e tyre diplomatike, duke e paraqitur si dënim të luftës së UÇK-së dhe jo vetëm të individëve.
“Imagjinoni ofensivën diplomatike që do të zhvillojnë vendet kundërshtare të pavarësisë sonë, të cilat nuk janë të pakta. E këto vende nuk do të flasin për dënime individuale, por do të flasin për dënimin dhe kriminalizimin e një lufte çlirimtare, siç ishte ajo e UÇK-së”, u shpreh Krasniqi.
Duke folur për dëshmitë e paraqitura gjatë procesit, ai tha se dëshmitarë nga kategori të ndryshme, përfshirë përfaqësues ndërkombëtarë dhe familjarë të viktimave, kanë dhënë dëshmi në mbështetje të pafajësisë së të akuzuarve.
Lexo edheMbrojtja e Afërt e kryeministrit Kurti ndërhyn ndaj protestuesit që e ndiqte nga pas
“Ata sot janë pengje të një ‘drejtësie ndërkombëtare’, e cila, me plot meritë, vetëm padrejtësi është”, deklaroi ai.
Krasniqi rikujtoi edhe sakrificën e popullit të Kosovës për liri, rolin e UÇK-së dhe mbështetjen e aleatëve ndërkombëtarë në momentet vendimtare.
“Kosova nuk e fitoi lirinë duke pritur që dikush t’ia dhuronte. Ajo e fitoi duke luftuar për të, duke sakrifikuar për të dhe duke pasur pranë vetes aleatë që, në momentin vendimtar, u rreshtuan në anën e drejtësisë”, theksoi ai.
Në përfundim, deputeti i PDK-së kërkoi që institucionet ta mbrojnë të vërtetën e luftës çlirimtare dhe që partitë t’i lënë mënjanë dallimet politike kur bëhet fjalë për UÇK-në dhe vlerat e saj.
“Prandaj, ju ftoj të gjithëve që, kur është në pyetje UÇK-ja dhe vlerat e saj, t’i lëmë anash dallimet politike”, tha Krasniqi, duke e përmbyllur fjalimin me një mesazh për katër ish-krerët e UÇK-së:
“Çlirimtarë, ju mbahuni të fortë, sepse edhe ne nuk do t’ju lëmë vetëm për asnjë moment!”
