Alkooli i kishte dhënë zemër inspektorit të Agjencisë së Inteligjencës së Kosovës, Shkelzen Sopjanit një natë në lokalin Wiskey Bar në Tiranë për të sharë dhe kërcënuar ambasadorin e Kosovës në Tiranë, Ramiz Lladrovcin.
Persona që ishin prezent i kanë treguar Gazetës Fjala se ky i fundit e kishte ftuar Sopjanin bashkë me 16 veta të tjerë të përbërë nga zyrtarë të Ministrisë së Punëve të Brendshme dhe AKI-së, që po merrnin pjesë në grup punues për Ligjin për të Huajt nga data 15 deri me 19 prill të këtij viti.
“Inspektori i AKI-së Shkelzen Sopjani e ka sharë dhe e ka kërcënuar Lladrovcin se ka informacione për të dhe se atë, së bashku me të gjithë komandantët e luftës, do t’i fus në burg”, ka thënë ky burim.
Gazeta Fjala mëson se për shkak të këtij konflikti Sopjani, i cili ka qenë nën ndikimin e alkoolit, ka filluar të qajë dhe të bërtas, ndërsa Lladrovci ka qëndruar i qetë dhe ka treguar respekt.
Megjithatë situata e njëjtë kishte vazhduar edhe në hotelin ku ka qëndruar Sopjani.
Por, pavarësisht ngjarjes, e tërë kjo është heshtur dhe të dy janë pajtuar me njëri-tjetrin.
Gazeta Fjala, ka provuar të kontaktojë me Ambasadorin Lladrovci për të marrë qëndrimin e tij për këtë çështje por në dy raste ai nuk ka kthyer përgjigje ndërsa në telefon ka qenë i pa qasshëm./Gazeta Fjala/
