Aksioni i sotëm në ‘Call Center’| 7 të arrestuar, mbi 4 milionë euro dëme- detaje nga aksioni i sotëm nga Policia në bashkëpunim me “Europol”

Viktimat joshen përmes platformave online që premtonin fitime të mëdha nga investimet. Fillimisht, ato investonin shuma të vogla dhe në llogaritë e tyre shfaqeshin fitime të rreme, me qëllim krijimin e besimit.

Më pas, personat që paraqiteshin si ndërmjetës financiarë ushtronin presion për investime më të mëdha. Kur viktimat kërkonnin të tërhiqnin paratë, dyshohet se u pengohej tërheqja, derisa mashtruesit zhdukeshin me shumat e investuara.

Hetimi ka nisur në vitin 2022, pas ankesës së një çifti gjerman që kishte investuar kursimet përmes një platforme online, por nuk kishte arritur t’i tërhiqte fitimet.

Çfarë dihet për aksionin në Kosovë?

Prokuroria Speciale e Republikës së Kosovës dhe Policia e Kosovës, përmes Drejtorisë për Hetimin e Krimeve Ekonomike dhe Korrupsionit dhe Sektorit për Hetime Financiare, kanë marrë pjesë në operacion.

Zëdhënësja e Prokurorisë Speciale, Arbnora Luta, ka konfirmuar për lajmi.net se aksioni është zhvilluar në bashkëpunim me autoritetet ndërkombëtare.

“Mund të konfirmojmë që është duke u zhvilluar një aksion, në bashkëpunim me autoritetet ndërkombëtare”, ka thënë Luta.

Europol-i ka dërguar ekspertë në Kosovë dhe Shqipëri për të mbështetur hetimet digjitale dhe analizimin e provave të sekuestruara.

Deri më tani, autoritetet nuk kanë dhënë detaje të tjera për lokacionin e saktë të qendrës së thirrjeve në Kosovë, identitetin e të arrestuarve apo rolin individual të tyre në skemën e dyshuar kriminale./Lajmi.net/