Kryeministri i Republikës së Kosovës, Ramush Haradinaj është ndier në siklet kur është pyetur nga gazetarët pas takimit që pati me myftiun e Kosovës, Naim Tërnavën, nëse ai e ka falur sot Fiter Bajramin.
Haradinaj duke ironizuar është përgjigjur në pyetjen e gazetarit. Ai tha se nuk e ka falur vetë Bajramin por për të e ka falur myftiu.
“Unë… myftiu e ka falë për mua”, ka thënë Haradinaj teksa është larguar duke buzëqeshur nga takimi me përfaqësuesit e Bashkësisë Islame të Kosovës.
Haradinaj ka thënë se “së bashku me zv/kryeministrin Pacolli dhe kabinetin tim qeveritar kemi ardhur për ta uruar për këtë festë Bashkësisë Islame të Kosovës, myftiun Naim Tërnavën dhe bashkëpunëtorët e tij duke uruar ta gëzojmë këtë festë në harmoni fetare siç dimë ne shqiptarët.
“Po ashtu duke shprehur mirënjohje që kanë agjëruar zoti u pranoftë sakrificën. Institucionet e vendit ju intereson ana shpirtërore njëkohësisht shprehim mirënjohje për Bashkësinë Islame por edhe për të tjerat”, ka deklaruar Haradinaj.
