Raportet e së shtunës bëjnë të ditur se Gonçalo Ramosi do të bëhet lojtari më i paguar te Milani pasi të përfundojë transferimi i tij nga PSG, përveç një shume marramendëse transferimi, e cila sipas disa mediave mund të kalojë edhe 80 milionë euro.
Sipas raportimeve të publikuara të premten nga disa burime, Milani ka arritur marrëveshje për të transferuar sulmuesin portugez në “San Siro” përpara sezonit 2026/27, në një operacion që pritet ta bëjë atë blerjen më të shtrenjtë në historinë e klubit.
Ka pasur versione të ndryshme mbi koston e saktë të marrëveshjes, por sipas Fabrizio Romanos, tarifa fikse do të jetë 74 milionë euro.
Ndërkohë, disa media italiane raportojnë se, nëse plotësohen të gjitha bonuset dhe llogariten komisionet, shifra totale mund të tejkalojë 80 milionë euro.
Kjo do të ishte dukshëm më shumë se rekordi i mëparshëm i Milanit, që ishte 49.4 milionë eurot e paguara me këste për transferimin e Rafael Leaos nga Lille në vitin 2019.
Përditësimet më të fundit të së shtunës tregojnë gjithashtu se Ramos do të bëhet edhe lojtari me pagën më të lartë në skuadër, duke përfituar një pagë fikse prej 7 milionë eurosh në sezon.
Aktualisht, Rafael Leao është futbollisti më i paguar te Milani, gjithashtu me rreth 7 milionë euro në sezon, por kjo shumë përfshin bonuset, ndërsa paga bazë e Ramos do të jetë 7 milionë euro të garantuara.
