Drejtori ekzekutiv i Southamptonit, Phil Parsons, ka kërkuar falje zyrtarisht pas përjashtimit tronditës të klubit nga play-off-i i Championshipit, duke pranuar se klubi kishte gabuar duke spiunuar stërvitjen e Middlesbrough.
Megjithatë, drejtuesi i “Saints” ka mbrojtur ashpër klubin, duke pretenduar se dënimi është krejtësisht jashtë proporcioni krahasuar me sanksionet e mëparshme ndaj klubeve si Leeds United dhe Chelsea.
Southampton pranon fajin në skandalin “Spygate”
Southamptoni ka thyer heshtjen pas vendimit sensacional për ta përjashtuar nga finalja e play-off-it të Championshipit. Skuadra e Tonda Eckert u përjashtua të martën nga një komision i pavarur disiplinor, pasi u zbulua se klubi kishte dërguar një praktikant të ri analist për të vëzhguar seancën stërvitore të Middlesbrough, 48 orë para gjysmëfinales vendimtare.
Në një deklaratë të detajuar, drejtori ekzekutiv Phil Parsons pranoi shkeljen e rregullave, por konfirmoi se klubi po lufton për t’u rikthyer në garë dhe për të luajtur finalen kundër Hull Cityt.
“Ne kemi apeluar vendimin e djeshëm të Komisionit të Pavarur Disiplinor për përjashtimin e Southampton Football Club nga play-off-i i Sky Bet Championship, si dhe zbritjen e katër pikëve për sezonin 2026-27”, deklaroi Parsons.
“Para se të flas për apelin, dua t’u drejtohem drejtpërdrejt dhe pa asnjë ekuivok tifozëve tanë, lojtarëve tanë dhe komunitetit më të gjerë të futbollit.”
Parsons kërkon falje për skandalin
Edhe pse klubi po ndjek rrugët ligjore për ta rrëzuar vendimin, Parsons pranoi se ajo që ndodhi ishte e gabuar.
“Ajo që ndodhi ishte e gabuar”, tha ai. “Klubi ka pranuar shkeljen e Rregulloreve 3.4 dhe 127 të EFL-së. U kërkojmë falje klubeve të përfshira dhe, mbi të gjitha, tifozëve të Southamptonit, besnikëria dhe mbështetja e jashtëzakonshme e të cilëve këtë sezon meritonin më shumë nga klubi.”
Drejtori ekzekutiv shtoi se Southamptoni dëshiron të ndihmojë edhe në përmirësimin e zbatimit të rregullave në të ardhmen.
“Ne kemi bashkëpunuar plotësisht me hetimin dhe procesin disiplinor të EFL-së. Pas apelit, do t’i shkruajmë gjithashtu EFL-së për të ofruar pjesëmarrjen tonë në një grup pune mbi zbatimin praktik dhe forcimin e Rregullores 127 në Championship. Pendesa pa ndryshim është e zbrazët dhe ne synojmë ta dëshmojmë ndryshimin”, shtoi ai.
Krahasimi me rastin e Leedsit
Pavarësisht faljes, ankesa kryesore e Southamptonit lidhet me ashpërsinë e dënimit. Parsons përmendi rastin e Leeds United, që në vitin 2019 u gjobit me 200 mijë funte për një incident të ngjashëm skautimi gjatë periudhës së Marcelo Bielsas.
“Sa i përket apelit, ne e pranojmë se duhet të ketë një sanksion. Ajo që nuk mund ta pranojmë është një dënim që nuk ka asnjë proporcion me shkeljen. Leeds United u gjobit me 200 mijë funte për një shkelje të ngjashme, ndërsa Southamptonit i është mohuar mundësia për të luajtur në një ndeshje që vlen më shumë se 200 milionë funte dhe që ka domethënie të jashtëzakonshme për stafin, lojtarët dhe tifozët tanë”, thuhej në deklaratë.
Sipas Parsons, pasoja financiare e vendimit e bën këtë ndëshkim më të rëndin të vendosur ndonjëherë ndaj një klubi anglez.
“Ne besojmë se pasoja financiare e vendimit të djeshëm e bën atë, me një diferencë shumë të madhe, dënimin më të madh të vendosur ndonjëherë ndaj një klubi anglez. Zbritja prej 30 pikësh për Luton Town në sezonin 2008-09, deri më tani sanksioni më i rëndë sportiv në futbollin anglez, iu dha një klubi që tashmë ishte në League Two dhe pa të ardhura të krahasueshme në lojë. Zbritja prej 21 pikësh për Derby County në vitin 2021 i kushtoi klubit statusin në Championship. Ndërsa Evertonit, në sezonin 2023-24, iu zbritën përfundimisht gjashtë pikë pas humbjeve prej 124.5 milionë funtesh, një shifër që zbehet krahasuar me atë që i është marrë Southamptonit brenda një pasditeje të vetme.”
Krahasimi me dënimin e Chelseat
Parsons e krahasoi gjithashtu vendimin me ndëshkimet e fundit në Premier League, përfshirë gjobën prej 10.75 milionë funtesh ndaj Chelseat për pagesa të padeklaruara.
“Dënimi më i madh financiar i vendosur ndonjëherë nga Premier League, ndaj Chelseat në mars të këtij viti, ishte 10.75 milionë funte dhe nuk u shoqërua me asnjë sanksion sportiv, pavarësisht se bëhej fjalë për 47.5 milionë funte pagesa të padeklaruara gjatë shtatë viteve”, shtoi ai.
“Ne nuk e themi këtë për të minimizuar atë që ndodhi në klubin tonë, pasi e kemi pranuar se ishte e gabuar. E themi sepse proporcionaliteti është vetë një parim i drejtësisë natyrore. Komisioni kishte të drejtë të vendoste një sanksion, por ne do të argumentojmë se nuk kishte të drejtë të vendoste një dënim dukshëm joproporcional krahasuar me çdo sanksion të mëparshëm në historinë e futbollit anglez.”
Apeli i Southamptonit pritet të shqyrtohet menjëherë, ndërsa klubi ka paralajmëruar se do të japë një përditësim të ri pas vendimit. /GazetaExpress/
