Federata spanjolle e futbollit ka dënuar portierin e Real Zaragoza, Esteban Andrada, me 13 ndeshje pezullim të mërkurën, pasi ai goditi me grusht në fytyrë një lojtar të SD Huesca.
Komisioni disiplinor i federatës njoftoi në një deklaratë se si reprezentuesi argjentinas, ashtu edhe klubi i tij do të gjobiten, pasi ai fillimisht u përjashtua me karton të kuq dhe më pas “sulmoi” lojtarin e Huescas, Jorge Pulido, në derbin e kategorisë së dytë të dielën e kaluar.
Andrada u ndëshkua me 12 ndeshje pezullim për vetë goditjen, ndërsa kartoni i kuq fillestar sjell automatikisht një ndeshje pezullim shtesë, duke e lënë jashtë për pjesën e mbetur të sezonit dhe duke i dhënë një goditje shpresave të Zaragozës për të shmangur rënien nga liga.
35-vjeçari, i huazuar nga klubi meksikan CF Monterrey, fillimisht e shtyu Pulidon dhe u ndëshkua me karton të dytë të verdhë për incidentin.
Më pas, Andrada humbi kontrollin, vrapoi drejt Pulidos për ta goditur dhe shkaktoi një përleshje në fushë në minutat shtesë të ndeshjes.
“E vërteta është që më vjen shumë, shumë keq për atë që ndodhi,” tha Andrada pas ndeshjes.
“Nuk është një imazh i mirë për klubin, për tifozët dhe sidomos jo për një profesionist si unë. Prandaj, më vjen shumë keq.”
Edhe portieri i Huescas, Dani Jiménez, dhe lojtari i Zaragozës, Dani Tasende, u përjashtuan pas përleshjes, ndërsa Huesca arriti të mbajë fitoren 1-0. Jiménez u pezullua për katër ndeshje, ndërsa Tasende për dy.
“Pamë skena që nuk i përkasin këtij sporti dhe që nuk duhet të kishin ndodhur kurrë,” deklaroi Zaragoza në një reagim të dielën.
