Qentë robotë me koka silikoni hiperrealiste të modeluara sipas figurave të famshme – përfshirë Elon Musk, Mark Zuckerberg, Jeff Bezos, Andy Warhol dhe Pablo Picasso – mund të shihen duke lëvizur nëpër muze në Berlin, duke “nxjerrë” herë pas here imazhe të shtypura të mjedisit përreth tyre që i kanë kapur më parë me kamera të integruara.
Instalimet janë pjesë e një projekti interaktiv nga artisti amerikan Beeple, aktualisht i ekspozuar në Neue Nationalgalerie.
Çdo imazh i shtypur tregon një pjesë të realitetit të transformuar nga inteligjenca artificiale për të reflektuar “personalitetin” e qenit, ose botëkuptimin e personit kokën e të cilit mban – për shembull, qeni me imazhin e Picasso krijon piktura në stilin kubist, ndërsa qeni Warhol prodhon vepra në një estetikë pop-art.
Organizatorët thonë se instalimi është një koment mbi mënyrën se si perceptimet tona formohen nga algoritmet dhe platformat teknologjike.
“Njëherë e një kohë, pikëpamja jonë për botën formohej nga mënyra se si artistët e shihnin realitetin”, tha Beeple. “Mënyra se si pikturonte Picasso ndryshoi pikëpamjen tonë për botën, ashtu si edhe mënyra se si Warhol interpretonte kulturën e konsumatorit.”
Sot, shton artisti, raporton AP, perceptimi po formësohet gjithnjë e më shumë nga miliarderët e teknologjisë që kontrollojnë algoritme të fuqishme dhe vendosin se çfarë do të shohim dhe çfarë jo.
“Është një sasi e madhe pushteti që ende nuk e kuptojmë plotësisht – sepse kur duan të ndryshojnë diçka, nuk kanë nevojë të lobojnë në OKB ose të kalojnë nëpër Kongres apo BE. Ata thjesht ndryshojnë algoritmet” – theksoi ai.
Qentë në instalacion mbajnë gjithashtu koka që përshkruajnë vetë Beeple-in.
