Kandidatja për presidente, Feride Rushiti, është larguar nga ambientet e Kuvendit të Kosovës pas dështimit të seancës së dytë për zgjedhjen e presidentit.
Në pamjet e realizuara nga Indeksonline, ajo shihet teksa përshëndetet me ministrin e Jashtëm, Glauk Konjufca, nënkryetarin Adrian Gola dhe deputetin Ilir Kërçeli.
Ndërsa, seanca nuk arriti të zhvillohet për shkak të mungesës së deputetëve të opozitës, duke pamundësuar kuorumin dhe vazhdimin e procesit zgjedhor.
Kjo situatë ka shtyrë edhe një herë vendimmarrjen për një nga postet më të rëndësishme shtetërore.
Pas përfundimit pa sukses të kësaj tentative, Rushiti u pa duke u larguar nga ndërtesa e Kuvendit, ndërsa nuk ka pasur deklarime publike lidhur me largimin e saj.
Ndërkohë, nga Kuvendi, konkretisht Albulena Haxhiu është bërë e ditur se seanca e radhës për zgjedhjen e presidentit pritet të mbahet sot në ora 19:00, ku mbetet të shihet nëse do të ketë pjesëmarrje të plotë të deputetëve dhe nëse procesi do të ecë përpara.
