Presidenti i Interit, Beppe Marotta, këmbëngul se klubi është “i tronditur” që është përfshirë në hetimin ndaj Gianluca Rocchi, por thekson se janë “të sigurt që nuk jemi të përfshirë”.
Ditët e fundit Interi është përmendur në media për shkak të hetimit ndaj Rocchit për mashtrim sportiv, ku një nga akuzat është se ai caktonte gjyqtarë që favorizonin “Nerazzurrët” sezonin e kaluar.
Megjithatë, shumë detaje mbeten të paqarta, përfshirë me kë supozohet se Rocchi ka bashkëpunuar, ndërsa kjo çështje ka rikthyer frikën për një skandal të ri si “Calciopoli”.
“Po i mësojmë të gjitha nga mediat, ndaj jemi të habitur nga këto deklarata,” tha Marotta për “Sky Sport Italia”.
“Para së gjithash, ne nuk kemi gjyqtarë që i favorizojmë apo që janë kundër nesh. Jemi të bindur se kemi vepruar në mënyrë të drejtë, gjë që duhet t’i qetësojë të gjithë. Sezonin e kaluar, pa u ankuar por si fakt objektiv, pati disa vendime gjyqtarësh kundër nesh që edhe vetë zyrtarët i pranuan si gabime, për shembull penalltia që nuk u dha në ndeshjen Inter–Roma”, shtoi ai.
Marotta theksoi se fokusi i klubit mbetet te sezoni aktual dhe fitimi i titullit në Serie A.
“Jemi këtu të fokusuar te kjo ndeshje, te ky sezon dhe te ky Scudetto që duam ta fitojmë. Jemi të sigurt se Interi nuk është i përfshirë në këtë situatë dhe nuk do të përfshihet as në të ardhmen”, u shpreh ai.
Ka raportime se përfaqësues të Interit mund të thirren si dëshmitarë në hetim, sidomos nëse ai zgjerohet në figura të tjera të arbitrimit.
“Kam qenë shumë i qartë për këtë,” u përgjigj Marotta.
Hetimi lidhet me një situatë të supozuar në “San Siro” gjatë një gjysmëfinaleje të Coppa Italia në prill 2025, kur Rocchi dyshohet se caktoi Andrea Colombo për një ndeshje të Interit në vend të Daniele Doveri, duke “bashkëpunuar” me dikë për këtë vendim.
“Isha i befasuar sepse nuk më kujtohet asgjë e tillë. Siç thashë, po i mësojmë këto nga mediat,” shtoi ai.
“Duam t’i sigurojmë tifozët e Interit: jemi këtu për të luajtur kundër Torinos, për të fituar një Scudetto të merituar dhe e përsëris se kemi vepruar me ndershmëri maksimale”, vazhdoi ai.
Kjo ka qenë një javë e jashtëzakonshme për “Nerazzurrët”, të cilët përkohësisht krijuan një epërsi prej 12 pikësh në krye të Serie A.
Ata gjithashtu përmbysën rezultatin nga 2-0 për të mposhtur Comon me rezultat 3-2 në gjysmëfinalen e Kupës së Italisë, duke siguruar finalen kundër Lazios dhe mundësinë për një “Double” më 13 maj.
“Urime trajnerit dhe skuadrës, por dua të theksoj se nuk kemi arritur ende asgjë. Ekipi është shumë i fokusuar. Do të ishte hera e 10-të që fitojmë Kupën e Italisë, gjë që do të ishte diçka e mrekullueshme dhe e jashtëzakonshme për Interin,” përfundoi Marotta./GazetaExpress/
