Ndjenja e plogështisë dhe lodhjes mund të jetë më shumë se thjesht mungesë energjie — sipas mjekëve, ajo mund të jetë një shenjë e një gjendjeje të zakonshme si dehidratimi, veçanërisht gjatë muajve të ngrohtë.
Sipas Dr Barbara Kubicka, ndjesia e etjes është një nga shenjat më të dukshme të dehidratimit, së bashku me tharjen e gojës dhe buzëve, urinën më të errët dhe urinimin më të rrallë. Në raste më të rënda, mund të shfaqen edhe marramendje, konfuzion dhe mungesë energjie.
Ajo shpjegon se gjatë motit të nxehtë, trupi humbet më shumë lëngje përmes djersitjes, ndaj nevojitet një konsum më i madh uji për të kompensuar këtë humbje. Përveç kësaj, temperaturat e larta shkaktojnë zgjerimin e enëve të gjakut, çka mund të ulë lehtë tensionin e gjakut dhe të sjellë ndjesi dobësie apo plogështie nëse nuk hidratohemi mjaftueshëm.
“Shpesh, njerëzit e lidhin lodhjen me faktorë të tjerë, pa e kuptuar se mund të jetë thjesht dehidratim,” thekson ajo.
Rekomandohet që një i rritur të konsumojë mesatarisht rreth dy litra ujë në ditë, megjithëse kjo sasi ndryshon në varësi të peshës trupore, aktivitetit fizik dhe faktorëve të tjerë. Sipas mjekes, një formulë orientuese është rreth 30 ml ujë për kilogram peshë trupore në ditë.
Një mënyrë efektive për të qëndruar i hidratuar është të mbani gjithmonë ujë pranë dhe të pini rregullisht gjatë ditës. Gjithashtu, hidratimi nuk vjen vetëm nga pijet, por edhe nga ushqimet e pasura me ujë si kastraveci, shalqiri, selinoja, kungulli i njomë dhe lakra.
Ekspertja këshillon të shmangen pijet me kafeinë dhe alkool si burim hidratimi, pasi ato mund të rrisin humbjen e lëngjeve. Nëse konsumohen, ato duhet të kompensohen me më shumë ujë.
Mesazhi është i thjeshtë: nëse ndiheni të lodhur apo pa energji, sidomos në ditët e nxehta, mos e neglizhoni — mund të jetë sinjal që trupi ka nevojë për më shumë ujë. /GazetaExpress/
