Autoritetet shëndetësore kanë tërhequr urgjentisht nga tregu disa pako të një ilaçi të përdorur gjerësisht për trajtimin e tensionit të lartë, pasi ekziston rreziku që në paketim të jenë vendosur tableta të gabuara.
Sipas Medicines and Healthcare products Regulatory Agency (MHRA), disa pako të ilaçit Ramipril mund të jenë mbushur gabimisht me tableta Amlodipine, një tjetër ilaç për tensionin e gjakut që vepron në mënyrë të ndryshme në organizëm.
Cilët pacientë duhet të kontrollojnë ilaçin
Njoftimi vlen për paketimet 5 mg të ramiprilit të prodhuara nga kompania Crescent Pharma Limited. Pacientët këshillohen të kontrollojnë numrin e serisë GR164099, i cili ndodhet në kutinë e jashtme.
Nëse brenda paketës fletët e tabletave (blisterat) janë të etiketuara si amlodipinë, ato duhet të kthehen menjëherë në farmaci. Paketat që përmbajnë tableta të etiketuara saktë si ramipril nuk kanë nevojë të kthehen.
Si ndodhi gabimi
Sipas autoriteteve, gabimi mendohet të ketë ndodhur gjatë procesit të paketimit në fabrikë, ku prodhohen të dyja ilaçet. Meqenëse të dy përdoren për trajtimin e tensionit të lartë, rreziku për pacientët konsiderohet relativisht i ulët.
Efekti më i mundshëm nëse merren tabletat e gabuara është marramendja, si pasojë e uljes së tepërt të tensionit të gjakut.
Personat që mendojnë se kanë marrë tabletat e gabuara dhe ndihen keq duhet të kërkojnë këshillë mjekësore dhe të marrin me vete ilaçin dhe fletëudhëzuesin.
Farmacitë dhe profesionistët e shëndetësisë janë udhëzuar gjithashtu të kthejnë çdo stok të mbetur nga seria e prekur.
Si veprojnë këto ilaçe
Ramipril bën pjesë në grupin e barnave të quajtura frenues ACE. Ai ul tensionin e gjakut duke bllokuar një hormon që normalisht shkakton ngushtimin e enëve të gjakut. Si rezultat, enët relaksohen dhe qarkullimi i gjakut përmirësohet, duke ulur ngarkesën mbi zemrën.
Ndërsa Amlodipine është bllokues i kanaleve të kalciumit. Ai pengon hyrjen e kalciumit në qelizat e muskujve të enëve të gjakut, duke i relaksuar ato dhe duke ulur tensionin.
Të dy ilaçet përdoren gjerësisht për trajtimin e tensionit të lartë dhe për të ulur rrezikun e infarktit dhe goditjes në tru, edhe pse veprojnë në mënyra të ndryshme biologjike.
Ramiprili është ndër barnat më të përshkruara me recetë në Mbretërinë e Bashkuar, me mbi 35 milionë receta të lëshuara vetëm në periudhën 2024–2025. Në disa raste, ky ilaç mund të shkaktojë edhe kollë të vazhdueshme si efekt anësor, një problem që mund të zgjasë për disa muaj. /GazetaExpress/
