Instituti Hidrometeorologjik i Kosovës ka lëshuar një paralajmërim me nivel të verdhë, duke sinjalizuar reshje të dendura dhe rrezik të mundshëm për vërshime në disa zona të vendit.
Sipas institutit, situata hidrometeorologjike pritet të përkeqësohet nga mbrëmja e së shtunës, duke rritur nivelin e rrezikut në disa pellgje lumore, transmeton lajmi.net.
Në njoftim theksohet se, edhe pse lumenjtë kanë shënuar rënie të përkohshme, reshjet e reja – sidomos në pjesën lindore, në Pellgun e Moravës së Binçës – mund të shkaktojnë shtim të prurjeve nga zonat malore.
Rritja e nivelit të ujit në lumin Morava e Binçës dhe në degën e saj, Kriva Reka, mund të sjellë vërshime të reja.
Rreziku pritet të shtrihet edhe në pjesë të tjera të Kosovës, përfshirë rajonin veri-lindor (Pellgu i Llapit), atë qendror (Sitnica) dhe jugun e vendit (Pellgu i Lepencit).
IHMK thekson se moti i paralajmëruar është potencialisht i rrezikshëm dhe qytetarët duhet të jenë të kujdesshëm, të informuar dhe të shmangin aktivitetet që mund t’i ekspozojnë ndaj rreziqeve meteorologjike./lajmi.net/
