Kreu i Kuvendit të Kosovës, Dimal Basha, ka dalë me një njoftim në profilin e tij për zgjedhjen e deputetit Nenad Rashiq si nënkryetar i Kuvendit të Kosovës nga radhët e komunitetit serb. Basha ka thënë se me këtë vendim, kuvendi i Kosovës është konstituuar plotësisht.
Basha ka shkruar se tashmë Kuvendi ka përbërje të plotë dhe ka falënderuar deputetët e Kuvendit që mundësuan procesin e finalizimit të konstituimit.
Dimal Basha e kishte konsideruar të konstituuar Kuvendin e Kosovës edhe javë më parë kur dështoi të zgjidhet nënkryetari i pestë dhe kur nuk u votua as Nenad Rashiq.
Megjithatë vendimi i Gjykatës Kushtetuese kishte konstatuar se Kuvendi s’ishte konstituuar dhe si rrjedhojë është mbajtur edhe seanca e sotme konstituive./Express/
Postimi i plotë i Bashës:
Të dashur qytetarë,
Kam kënaqësinë t’ju njoftoj se sot, me 71 vota për, Kuvendi i Republikës së Kosovës zgjodhi deputetin Nenad Rashiq në pozitën e Nënkryetarit të Kuvendit nga radhët e komunitetit serb, dhe me këtë vendim Kuvendi i Republikës së Kosovës është konstituuar plotësisht.
Pas një periudhe të gjatë, Kryesia e Kuvendit është tashmë e kompletuar në përbërje të plotë, ashtu siç parashihet me Kushtetutën e Republikës së Kosovës dhe Rregulloren e Kuvendit.
Falënderoj të gjithë deputetët e Kuvendit të Kosovës që me votat e tyre mundësuan konstituimin e plotë të Kuvendit në legjislaturën e IX-të.
