Ambasadori i Mbretërisë së Bashkuar në Kosovë, Jonathan Hargreaves, është takuar sot me Kryetarin e Gjykatës Kushtetuese të Kosovës, Nexhmi Rexhepi, në një takim që ai e cilësoi të rëndësishëm për funksionimin demokratik të vendit.
Përmes një postimi në rrjetet sociale, Hargreaves theksoi pritshmërinë e Mbretërisë së Bashkuar që vendimet e Gjykatës Kushtetuese lidhur me formimin e Kuvendit të Kosovës të respektohen dhe zbatohen nga liderët politikë, transmeton lajmi.net.
“Mbretëria e Bashkuar pret që vendimet e Gjykatës Kushtetuese në lidhje me formimin e Kuvendit të respektohen dhe zbatohen nga liderët politikë, në mënyrë që të përfundojë ngërçi që e ka mbajtur Kosovën të bllokuar për shumë kohë. Kështu, Kuvendi dhe një qeveri e re do të mund të fillojnë punën në interes të qytetarëve të Kosovës”, ka deklaruar ambasadori.
Ai shtoi se puna e Gjykatës është thelbësore për mbrojtjen dhe ruajtjen e Kushtetutës së Kosovës dhe se pavarësia e saj është thelbësore për funksionimin e saj.
Ky mesazh vjen në kohën kur vendi ndodhet në një situatë politike të tensionuar, me përplasje institucionale për formimin e institucioneve të reja pas zgjedhjeve të fundit./lajmi.net/
