Në fshatin Llugë të komunës së Podujevës u përurua sot shtatorja e heroit të kombit Afrim Zhitia. Në kuadër të këtij aktiviteti u bë edhe rinovimi i obeliskut dhe rregullimi i mjedisit përreth.
Në këtë ngjarje morën pjesë figura të larta shtetërore dhe politike nga Kosova dhe rajoni, të cilët theksuan rëndësinë e ruajtjes së kujtesës historike dhe nderimit të figurave që dhanë jetën për lirinë e vendit.
Kryeministri në detyrë i Kosovës, Albin Kurti, në fjalën e tij theksoi rezistencën heroike të Afrim Zhitisë dhe Fahri Fazliut, duke e cilësuar ngritjen e kësaj shtatoreje si një hap të rëndësishëm në ruajtjen e kujtesës kolektive.
“Sot, në vendlindjen e Afrimit, po i shtohet edhe një vepër komemoruese publike djalit të Llapit dhe heroit të Kosovës. Shoqëritë më përparimtare të botës kanë sjellë politika të ndryshme të kujtesës për ngjarjet e tyre historike dhe për figurat më të rëndësishme kombëtare. Kështu, vitin e kaluar, më 2 nëntor 2024, u patëm takuar bashkë në akademinë në Prishtinë. Fahri Fazliu dhe Afrimi rezistuan të armatosur deri në vdekje. Sivjet, derisa po i afrohemi dekadës së katërt, jemi bashkuar në fshatin Llugë, në vendlindjen e Afrimit. Sot po i shtohet edhe një skulpturë, një vepër monumentale publike e komemorimit të Afrim Zhitisë, djalit të Llapit dhe heroit të Kosovës”, tha Kurti.
Në përurim mori pjesë edhe kryetari i BDI-së dhe ish-epror i UÇK-së, Ali Ahmeti, i cili vlerësoi lartë figurën e Afrim Zhitisë, duke e quajtur atë një ndër figurat kyçe të rezistencës shqiptare.
“Vëllezër e motra këtu, me ndihmë e institucioneve dhe angazhimin e kryetarit të Podujevës po ngritët shtatorja e Afrim Zhitisë, sekretarit organizativ të Lëvizjes Kombëtare. Sot po ngritët shtatorja e kryeredaktorit të parë të gazetës ilegale ‘Minatori’, mu në ngjarjen më të mëdha që ndodheshin në Kosovë. Sot po ngritët shtatorja e Afrim Zhitisë, së kryeredaktorit të lajmëtarit të lirisë, gazetë që vepronte nën hundën e Beogradit. Ky ishte kryeredaktori që kërkonim në qiell dhe ai vepronte në tokën mëmë të Kosovës. Sot po ngritët shtatorja e Afrim Zhitisë, organizatorit dhe ideatorit të parë që rezistencën nga ajo në rrugë ta shndërrojmë në rezistencë reciprociteti – në forcë t’i përgjigjemi pushtuesit, janë ngritë celulat e para nga Afrim Zhitia”, u shpreh Ahmeti.
Edhe lideri i Aleancës për Ardhmërinë e Kosovës (AAK), Ramush Haradinaj, theksoi nevojën për kujdes të veçantë ndaj kujtesës historike.
“Ne duhet të qëndrojmë të kujdesshëm që kujtesa jonë historike të ruhet, që e kaluara të jetë udhërrëfyes për të ardhmen dhe sa herë që kemi mundësi, ta paraqesim ashtu siç është. Ky akt i tillë i rezistencës në kohën e lirisë e ka përshpejtuar atë që ndodhi në Prekaz me komandantin legjendar e deri te liria e Kosovës”, tha Haradinaj.
Përurimi i shtatores dhe rinovimi i hapësirës përreth vjen në prag të 40-vjetorit të rënies së heroit Afrim Zhitia, si një akt nderimi për jetën dhe veprën e tij në shërbim të çështjes kombëtare shqiptare.
