Studimi i ri i Univeristetit të Utahs, ka treguar se ndryshimi i mënyrës së ecjes mund të lehtësojë dhimbjet e artrozës në gju, dhe efektet mund të jenë të ngjashme me ato të ilaçeve kundër dhimbjes që merren pa recetë, ka raportuar The Washington Post.
Pjesëmarrësit në studim, të rritur me artrozë të lehtë deri të moderuar u trajnuan të ecnin duke kthyer paksa majat e këmbëve nga brenda ose nga jashtë, për të shpërndarë ndryshe ngarkesën mbi gjurin. Rezultati? Dhimbjet kronike u lehtësuan.
“Mendoj se ky studim sjell shumë shpresë për njerëzit me artrozë të gjurit. Po vijnë trajtime të reja që mund të përmirësojnë dhimbjen e tyre”, ka thënë Scott Uhlrich, autori kryesor i studimit dhe drejtor i Movement Bioengineering Laboratory në Universitetin e Utahs.
Rreth 33 milionë amerikanë vuajnë nga artroza, e cila shkaktohet nga dëmtimi i kërcit të kyçit që ndodh si pasojë e fërkimit në mes të eshtrave. Kërcet nuk rigjenerohen, prandaj shpesh pacientët kuptojnë dëmtimin vetëm kur është vonë.
Sipas Uhlrich, ndryshimi i ecjes mund të shpërndajë forcat te pjesë më të shëndetshme të kërcit, duke ulur dhimbjen.
“Nuk po ulim forcën që kalon në gju, por po e zhvendosim nga pjesa e brendshme te kërcet më të shëndetshme në pjesën e jashtme”, ka thënë ai.
Megjithatë, doktori ka paralajmëruar se njerëzit nuk duhet ta provojnë vetë.
“Nuk ka një mënyrë që i bën mirë të gjithëve. Disa mund të përfitojnë duke kthyer gishtat nga brenda, të tjerë nga jashtë. Nëse e bën gabim, mund ta përkeqësosh dhimbjen”, ka thënë Uhlrich.
Rezultatet pas një viti
Studimi, i cili zgjati gati tre vjet, përfshiu 68 persona. Pjesëmarrësit që u trajnuan me ushtrime ose terapi të dizajnuara posaçërisht për stilin e ecjes së secilit individ, raportuan më pak dhimbje pas një viti, ndërsa skanimet MRI treguan edhe ngadalësim të dëmtimit të kërcit.
Efekti i këtij trajnimi ishte i krahasueshëm me marrjen e ilaçeve kundër dhimbjes, si ibuprofeni. Por ndryshe nga ilaçet, kjo metodë nuk sjell efekte anësore në stomak.
“Nuk do të dëshironim që një 30-vjeçar të merrte ilaçe kundër dhimbjes çdo ditë për dekada. Nëse arrijmë të ulim dhimbjen dhe të ruajmë kyçin pa ilaçe, ky është një hap i madh përpara”, tha Uhlrich.
E ardhmja: Këpuca inteligjente
Studiuesit përdorën pajisje laboratorike për të trajnuar ecjen, por Uhlrich ka thënë se së shpejti kjo mund të bëhet edhe me teknologji më të thjeshta.
“Nuk është më fantashkencë. Në të ardhmen, mund të shkosh në klinikë, të të incizojnë me një smartphone dhe të zbulojmë se cila mënyrë ecjeje është më e mira për ty”, ka thënë ai.
Edhe pse rezultatet janë premtuese, mjekët theksojnë se kjo metodë nuk funksionon për të gjithë pacientët me artrozë.
“Është emocionuese, por vetëm për një pjesë të pacientëve me artrozë të gjurit”, ka thënë Devyani Misra, reumatologe në Harvard Medical School.
Ndërkohë, profesor Songning Zhang nga Universiteti i Tennesseet e quajti këtë “studim të madh klinik”, por ka theksuar se për momentin metoda më e sigurt mbetet aktiviteti i rregullt fizik si ecja dhe ushtrimet për forcimin e muskujve rreth gjurit.
