Vijon bashkëpunimi i Interpol Tiranës me homologët ndërkombëtarë, në kuadër të operacionit “The Wanted”, për kapjen dhe ekstradimin e shtetasve shqiptarë të shpallur në kërkim.
Nga Italia, u ekstradua shtetasi Hajrulla Xhivini, 42 vjeç. Aiakuzohet se gjatë muajit shkurt 2024 ka kanosur në mënyrë të përsëritur, për shkak të detyrës, gjyqtarin e Gjykatës Administrative të Lushnjës. Gjykata e Tiranës i kishte caktuar më herët masën e sigurisë “Arrest në burg”, për veprat penale “Kanosja për shkak të detyrës” dhe “Prishja e qetësisë publike”.
Nga Gjermania, u ekstradua shtetasi Brian Syzo, 34 vjeç, i shpallur në kërkim për veprën penale “Prodhimi dhe shitja e narkotikëve”. Ai akuzohet se ka shpërndarë doza kokaine në qytetin e Pogradecit. Gjykata e Korçës i kishte caktuar atij masën e sigurisë “Arrest në burg”.
NJOFTIMI:
1-Si rezultat i bashkëpunimit të Interpol Tiranës me Interpol Romën, në kuadër të operacionit “The Wanted”, për kapjen e shtetasve në kërkim ndërkombëtar dhe ekstradimin e tyre, u finalizuan procedurat për ekstradimin nga Italia, të shtetasit H. Xh., 42 vjeç, banues në Tiranë.
Gjykata e Shkallës së Parë e Juridiksionit të Përgjithshëm Tiranë, në vitin 2024, i ka caktuar atij, masën e sigurisë “Arrest në burg”, për veprat penale “Kanosja për shkak të detyrës” dhe “Prishja e qetësisë publike”. Shtetasi H. Xh. akuzohet se gjatë muajit shkurt 2024, ka kanosur në mënyrë të përsëritur, nëpërmjet celularit, për shkak të detyrës, shtetasin E. L., gjyqtar i Gjykatës Administrative Lushnjë, si dhe ka protestuar para Gjykatës së Lartë.
2-Gjithashtu, si rezultat i bashkëpunimit me homologët gjermanë, u finalizua ekstradimi nga Gjermania, i shtetasit shqiptar B. S., 34 vjeç. Gjykata e Shkallës së Parë e Juridiksionit të Përgjithshëm Korçë, i ka caktuar atij, masën e sigurisë “Arrest në burg” për veprën penale “Prodhimi dhe shitja e narkotikëve”. Shtetasi B. S. akuzohet për shitje të dozave të kokainës, në qytetin e Pogradecit.
Shtetasit e ekstraduar iu dorëzuan Drejtorisë së Përgjithshme të Burgjeve.
