Arsenali ka nisur kontaktet me Ajaxin për të tentuar transferimin e Jorrel Hatos, një prej mbrojtësve me më shumë potencial në futbollin evropian.
Në moshën 19-vjeçare, qendërmbrojtësi i ri holandez ka tërhequr vëmendjen e disa klubeve të mëdha në kontinent, dhe “Topçinjtë” nuk duan të mbeten prapa në garën për të siguruar shërbimet e tij.
Sipas mediave holandeze, konkretisht “De Telegraaf”, Chelsea është në avantazh dhe është e gatshme të shpenzojë mes 55 dhe 60 milionë euro për ta transferuar.
Megjithatë, skuadra e Mikel Artetës është përfshirë fuqishëm në bisedime dhe e sheh Haton si një element ideal falë aftësisë së tij për të luajtur si qendërmbrojtës ashtu edhe në krahun e majtë të mbrojtjes — një cilësi që përputhet në mënyrë të përkryer me stilin e gjithanshëm të trajnerit spanjoll.
Pavarësisht interesit në rritje nga Londra, trajneri i Ajaxit, John Heitinga, mbetet i kujdesshëm.
“Jorrel vazhdon të jetë pjesë e ekipit tonë. Gjithçka tjetër, për momentin, janë vetëm thashetheme,” deklaroi ai në një konferencë për shtyp, duke lënë një derë të hapur për qëndrimin e lojtarit, megjithëse Ajax gjithashtu ka nevojë për të gjeneruar të ardhura, dhe shitja e Hatos mund të jetë e rëndësishme për ekuilibrimin e financave.
Arsenali është në kërkim të përforcimeve në mbrojtje për të ardhmen dhe e konsideron Hato-n një investim strategjik afatgjatë.
Nuk do të jetë e lehtë as të bindet Ajax, e as të përballohet fuqia ekonomike e Chelseat, por në “Emirates” besojnë se projekti sportiv i tyre do të jetë çelësi për të tërhequr talentin e ri nga Holanda./GazetaExpress/
