Sonte rreth orës 21:30, në kuadër të planit operativ “Mbrojtja e Pyjeve 2025”, policia e Kaçanikut gjatë patrullimit në Malet e Sharrit, në rrugën për në Luboten, ka hasur një automjet tip xhip me rimorkio të ngarkuar me drunj të prera ilegalisht.
Pavarësisht sinjaleve të policisë për ndalim, personat e dyshuar kanë vazhduar lëvizjen, më pas në një rrugë malore kanë shkarkuar disa drunjë për të penguar policinë, i kanë vënë zjarrin automjetit xhip dhe janë larguar në drejtim të panjohur.
Në vendin e ngjarjes ka dalur komandanti i stacionit policor, një njësi e NJRSH-së dhe janë njoftuar edhe zyrtarët e Parkut Kombëtar “Sharri”.
Janë ndërmarrë veprime hetimore dhe është në proces identifikimi i të dyshuarve.
Policia Rajonale e Ferizajt në bashkëpunim me rojet e pyjeve po vazhdon angazhimet për parandalimin e prerjes dhe shitjes ilegale të drunjve.
“Ftojmë qytetarët që të bashkëpunojnë duke raportuar çdo rast përmes aplikacionit “Lajmëro Policinë” apo në numrat: 192, 0290/326-250 dhe 0290/322-406.
Të dhënat e raportuara do të ruhen me konfidencialitet të plotë” thuhet në njoftimin e policisë.
