Presidenti i Ukrainës, Volodymyr Zelensky ka pranuar që Ukraina të bisedojë me Rusinë.
Zelensky ka njoftuar se ka biseduar në telefon me presidentin e Bjellorusisë, Aleksandër Lukashenkon, aleatin e presidentit rus, Vladimir Putin.
“Rezultati i bisedës me Aleksandër Lukashenkon. Kemi rënë dakord që delegacioni ukrainas të takohet me rus pa kushte paraprake në kufirin ukraino-bjellorus, në zonën e lumit Pripyat”, shkroi Zelensky.
Presidenti ukrainas tha se Lukadhenko ka marrë përgjegjësi se avionët, helikopterët dhe raketat e vendosura në territorin bjellorus do të mbeten në tokë përgjatë nisjes, negociatave dhe kthimit të delegacionit ukrainas në vend.
Rusia u kishte dhënë zyrtarëve ukrainas afat kohor deri në orën 15:00për të vendosur nëse do të takohen për bisedime në Bjellorusi.
Presidenti ukrainas Zelensky tha se do të ishte i gatshëm të zhvillonte bisedime me Rusinë, por hodhi poshtë propozimin e palës ruse për një takim që do të mbahej në Bjellorusi.
Bjellorusia është një aleat i Rusisë dhe ka luajtur rol kyç në pushtimin rus të Ukrainës. Trupat ruse pushtuan kufirin e Ukrainës me Bjellorusinë me mbështetjen e qeverisë bjelloruse, sipas zyrtarëve ukrainas.
Administrata e SHBA-së i ka sanksionuar nëntë firma mbrojtëse bjelloruse për mbështetjen e tyre ndaj pushtimit.
