Organizata e Veteranëve të Luftës së UÇK-së ka reaguar sot përmes një komunikate për media, duke e cilësuar shtyrjen e vendimit për ish-udhëheqësit e UÇK-së në Hagë si një tjetër goditje të rëndë ndaj drejtësisë dhe të drejtave themelore të njeriut.
Në reagim thuhet se zgjatja e paraburgimit për afro gjashtë vjet pa një vendim përfundimtar nuk mund të konsiderohet procedurë e rregullt ligjore, por, sipas tyre, përbën “dënim pa aktgjykim”.
“Asnjë gjykatë e financuar në emër të demokracisë nuk mund të normalizojë një trajtim të tillë ndaj ish-krerëve të Ushtrisë Çlirimtare të Kosovës, lufta e të cilëve i hapi rrugën lirisë dhe shtetësisë së Kosovës”, thuhet në komunikatë.
Sipas OVL-UÇK-së, këto vonesa po thellojnë një padrejtësi të papranueshme dhe po dëmtojnë besueshmërinë e institucioneve që pretendojnë të mbrojnë sundimin e ligjit.
Tutje theksohet se dinjiteti i të akuzuarve, familjeve të tyre dhe i popullit që ata përfaqësuan nuk duhet të mbahet peng i shtyrjeve të vazhdueshme.
Organizata u ka bërë thirrje shteteve demokratike që financojnë dhe mbështesin këtë gjykatë që të veprojnë pa vonesë, duke kërkuar respektimin e të drejtave të të akuzuarve dhe përfundimin sa më të shpejtë të procesit gjyqësor
