Një 20-vjeçar nga fshati Lubizhdë e Prizrenit është lënduar të mërkurën derisa ishte në vendin e tij të punës. Ai është dërguar për ndihmë mjekësore në spitalin e Prizrenit, e më pas në QKUK në Prishtinë.
Të mërkurën, në një fabrikë në Prizren një punëtor ka marrë lëndime të rënda.
Express merr vesh nga burime se i njëjti ka prerë dy gishtërinj të dorës së djathtë. 20-vjeçari aktualisht është duke u trajtuar në Qendrën Klinike të Kosovës në Prishtinë.
Ndërkohë, për këtë rast ka njoftuar edhe Policia e Kosovës në raportin 24 orësh.
Rasti ka ndodhur mbrëmjen e së mërkurës në fshatin Lubizhdë të Prizrenit, derisa policinë e ka njoftuar pronari i punëtorisë ku është lënduar punëtori.
Ai ka deklaruar se viktima ka lënduar aksidentalisht dorën e djathtë derisa ishte duke punuar.
“Ankuesi mashkull kosovar pronar i një punëtorie ka raportuar se punëtori i tij mashkull kosovar, duke punuar aksidentalisht ka lënduar dorën e djathtë. Viktima është dërguar në spitalin rajonal dhe më pas me autoambulancë është transportuar për në QKUK-së në Prishtinë për tretman të mëtutjeshëm mjekësor”, ka bërë të ditur policia.
