Partia Demokratike e Kosovës ka demantuar lajmin e publikuar në disa media elektronike për takimin e liderit të saj me ish-partneret e tij të koalicionit “PANA” Ramush Haradinaj, Fatmir Limaj dhe Behgjet Pacolli.
“Është i pavërtetë dhe spekulim lajmi se kryetari i PDK-së, Kadri Veseli është takuar me disa kryetarë të partive tjera për të diskutuar gjoja formimin e koalicionit qeveritar. Veseli është në takime sot gjatë ditës me zyrtarë të Shqipërisë. PDK do të mbetet në opozitë sikurse e ka konfirmuar z. Veseli më 6 tetor 2019. Çfarëdo vonese në krijimin e qeverisë se re nga partia që ka dalë e para, është e dëmshme për interesin e vendit dhe të qytetarëve të Kosovës”, thuhet në reagimin e PDK-së.
Ndryshe, ajo çfarë u raportua në media, fillimisht në portalin “Indeksonline” duke ju referuar burimeve në PDK kishte të bënte me mundësinë e krijmit të institucioneve të reja, me qenë se Lëvizja Vetëvendosje dhe Lidhja Demokratike e Kosovës ende nuk janë dakorduar për nënshkrimin e marrëveshjes.
Deri më tani liderët e të dy partive, Albin Kurti dhe Isa Mustafa janë takuar 8 herë me synimin për të përmbyllur një marrëveshje për koalicion, por përpjekjet e deritashme kanë qenë të pasuksesshme./Gazeta Blic/
