Kryetari i PEK-ut, Milaim Zeka, që nuk ka mundur ta kalojë pragun elektoral për t’u bërë pjesë e parlamentit, ka fajësuar media të caktuara që nuk i kanë dhënë hapësirën e mjaftuar.
Ai ka thënë se partia e tij dhe ai janë bojkotuar gjatë fushatës zgjedhore në disa raste.
Zeka ka thënë se atij personalisht nuk do t’i mungojë Kuvendi, ku mandatin e kaluar ishte deputet.
“Por do t’u mungojë qytetarëve”, ka thënë Zeka.
“Në këtë pozicion jam komod, unë do t’i kthehem familjes, do t’i kthehem pak jetës sime”.
“Kam projekte filmike me të cilat do të merrem, por nga skena politike nuk do të largohem”, është shprehur ai.
Zeka ka folur është për momentumin politik nëpër të cilin po kalon vendi.
“Shoh sfida të jashtëzakonshme të Albin Kurtit dhe Vjosa Osmanit pasi që Qeveria e re do të jetë Qeveri e dialogut. Nuk ka asnjë proces politik që mund të ecë pa përfunduar një marrëveshje çfarëdo qoftë me Serbinë. Kosova apo kalon në momentin më të rëndë historik. Kam dyshime se Osmani dhe Kurti mund të bëjnë ndryshime të mëdha”.
“Si mund ta ndryshohet prokurori publik, kur atë punë e ka në dorë, Presidenti Thaçi, si mund ta ndryshosh drejtorin e AKI-së? Si mund ta heqësh Thaçin nga dialogu kur formatin e përcakton BE dhe SHBA?. Nëse i dërguarit i Trumpit e ka djersit Vuçiqin, nëse ka mbet 10 minuta pa tekst, imagjino se fare djersitje Amerika dhe Brukseli do t’i bëjë klasës politike në Kosovë”.
“Thaçi është lojtari më i mirë politike pas Presidentit Rugova dhe heshtja e tij, duhet zbërthyer nga Osmani dhe Kurti. Deklarata e tyre kundër presidentit se do ta largojnë nga dialogu dhe deklarata e Kurtit se nuk do ta marrë Listën Serbe në Qeveri janë të nxituara”.
Zeka është shprehur pesimist lidhur me krijimin e Qeverisë së re.
“Deklarata e këshilltarit të Isa Mustafës, Besnik Berisha se deri në vitin e ri s’do të ketë koalicion dhe heshtja e Thaçit flet që ai nuk sheh mundësinë që Kurti dhe LDK do të krijojnë qeveri të shpejtë. Po të shohësh deklaratat e nënkryetarit të LDK-së, Agim Veliu dhe ato diplomatike të Lutfi Hazirit, tregojnë se LDK nuk është unike për koalicionin me VV, kjo do të vonojë krijimin e qeverisë”.
“Elektorati i VV është shumë i veçantë – 90% të papunë që pret ndryshime radikale. Ndryshimet radikale ato kanë ndodh vetëm në kohë e Enver Hoxhës, Josef Stalinit dhe diktaturës. Kurti dhe Osmani edhe po të jenë supermenë nuk mund t’i bëjnë ndryshimet që pret elektorati. Elektorati i Kurit nëse për 6 muaj dëshpërohet do të ketë ndryshime”. /Klan Kosova
LEXO EDHE: Milaim Zeka: Fitorja e Albin Kurtit ka çmendur të tjerët, është fitore edhe për PEK-un
