Me rastin e 20 vjetorit të masakrës së Poklekut, ku u vranë e më pas u dogjën 54 shqiptarë civil të paarmatosur nga forcat serbe, një delegacion i Lëvizjes, i prirë nga kryetari Albin Kurti, deputetët Rexhep Selimi, Shemsi Syla dhe veprimtarët Enver Dugolli, Gani Krasniqi, Adem Gashi, Zeqir Bekolli, Shemsi Elezi, Xhavit Drenori së bashku me aktivistë nga Qendra e Lëvizjes në Drenas dhe Skenderaj bënë homazhe në këtë fshat.
Delegacioni i njëjtë më pas bëri homazhe edhe në Çikatovën e Vjetër ku u vranë 24 shqiptarë civil të paarmatosur.
Prej foshnjës gjashtëmuajshe e deri te plaku 75 vjeçar, shqiptarët civil të paarmatosur të Poklekut të Vjetër në komunën e Drenasit nuk u kursyen nga forcat serbe. Familjet Muqolli, Caraku e Elshani që provuan të largohen nga fshati në drejtim të Drenasit, u detyruan nën kërcënimin e tytave të armëve të forcave serbe të kthehen nëpër shtëpitë e tyre, ku qëndruan për një ditë të plotë të mbyllur nën ankth nga terrori i forcave serbe që edhe hynë nëpër këto shtëpi rreth orës 17:30 për të kryer një ndër masakrat më të tmerrshme.
Mbi trupat e 54 shqiptarëve civil të paarmatosur, nga foshnja gjashtë muajsh e deri tek plaku 75 vjeç, u hodhën granata e u zbrazën 7 karikator të automatikut. Secili u kontrollua me këmbë se a ishte gjallë, e më pas edhe iu vu zjarri shtëpisë – pra u dogjën trupat e 54 shqiptarëve civil të masakruar.
Në të njëjtën ditë, në fashatin Çikatovë e Vjetër u vranë edhe 24 shqiptarë civil të paarmatosur.
20 vite më pas, ende nuk është vënë kurrfarë drejtësie për këtë krim e gjenocid të kryer nga Serbia. Derisa këto krime, e mosvënia e drejtësisë na rëndojnë zemrën e mendjen çdo vit, presidenti e të ngjashëm si ai, ende besojnë se mund të arrihet një marrëveshje përfundimtare me Serbinë duke mos i përmendur këto krime. Kjo është e pafalshme. Këto krime të Serbisë nuk do të harrohen kurrë, dhe duhen përmendur e përkujtuar përherë.
