Sot në Marinë është hapur varri i heroit Sejdi Krelani, pasi dyshohej se trupi i të ndjerit nuk gjendej në atë varr. Pas hapjes së varrit u vërtetua se trupi i të ndjerit gjendet në atë varr, shkruan Drenica Press.
Në një komunikatë për media ndër të tjera komuna e Skenderajt thotë: Pas informatave në disa media rreth ndërrimit të varrit të heroit Sejdi Krelani nga Drenasi, sot është bërë hapja e varrit të heroit Krelani për të verifikuar të dhënat, transmeton Drenica Press.
Në Kompleksin e Dëshmorëve në Marinë, sot është konfirmuar edhe zyrtarisht në praninë e familjes Krelani, kryetarit të Komisionit Qeveritar për të Zhdukurit, Udhëheqësit të Njësisë së Komisionit, si dhe në praninë e kryetarit të Komunës së Skenderajt, z.Bekim Jashari, pas hapjes së varrit dhe verifikimit se të dhënat e heroit në arkivol janë po ato që janë të skalitura në epitafin e varrit të heroit Sejdi Krelani.
Me këtë rast, kryetari Jashari ka shprehur mirënjohjen dhe respektin më të madh për të gjitha familjet e heronjve dhe dëshmorëve, për bashkëpunimin dhe përkrahjen gjatë këtij procesi aq të ndejshëm.
Ai gjithashtu ka falënderuar të gjitha institucionet e angazhuara në këtë proces, në veçanti gjatë këtyre tri ditëve në adresim të shqetësimeve të familjes Krelani.
