Shtetet e Bashkuara të Amerikës kanë emëruar ambasadorin e ri të tyre në Kosovë, dhe ai është Philip S. Kosnett.
Presidenti Donald Trump, ka emëruar Kosnett, si ambasador të jashtëzakonshëm dhe fuqiplotë në Kosovë.
Kosnett aktualisht është i ngarkuar me punë i përkohshëm në Ambasadën e Shteteve të Bashkuara në Ankara, mision diplomatik të cilin e ka filluar në vitin 2016, shkruan gazetametro.net.
Gjatë karrierës së tij në Shërbimin e Jashtëm, ai ka punuar në tetë misione të Shteteve të Bashkuara në Evropë, Azi dhe Lindjen e Mesme si dhe në pozita të larta drejtuese në Departamentin e Shtetit.
Pjesa më e madhe e karrierës së Kosnett ka qenë e fokusuar në bashkëpunimin ndërkombëtar të sigurisë dhe pajtimin politik.
Ai ka shërbyer si zëvendësshef misioni në Uzbekistan dhe në Islandë; si dhe në pozita politike, politiko-ushtarake dhe ekonomike-tregtare në Afganistan, Irak, Kosovë, Holandë dhe Japoni.
Në Uashington ai ka punuar në zyrat e Departamentit të Shtetit për Evropën, kundër-terrorizmit, politiko-ushtarake, të Inteligjencës dhe Kërkimeve etj.
Kosnett është diplomuar në Universitetin e Harvardit. Ai është nderuar me 10 çmime të Departamentit të Shtetit, ka marrë Medaljen e Zyrës së Sekretarit të Mbrojtjes për Shërbim Civil të Jashtëzakonshëm dhe Medaljen e Departamentit të Këmbësorisë për Shërbim Civil të Shkëlqyer.
Kosnett flet turqisht, rusisht, holandisht dhe japonisht. /gazetametro.net
