Kreu i grupit parlamentar të Partisë Socialiste ka akuzuar kryetarin e Partisë Demokratike se ka lidhje me vëllanë e dy personave në kërkim, të dyshuar si porositës së parave të sekuestruara së fundmi në Durrës.
Taulant Balla, nga foltorja e parlamentit, tregoi një fotografi të Lulëzim Bashës me disa persona. Një prej të cilëve është vëllai i dy personave të shpallur në kërkim si porositësit e 3.4 milion eurove të sekuestruara disa ditë më parë në portin e Durrësit, tha Balla.
“Ja ku është me vëllain e personave në shpallur në kërkim A.V. dhe E.V. në zyrën e Lulzimit, kjo është e pakundërshtueshme”, tha kreu i grupit parlamentar të Partisë Socialiste.
“Këtë provë do ia dorëzoj drejtësisë”, tha Balla.
Disa ditë më parë, Taulant Balla paralajmëroi se në seancën e kësaj të enjteje do ti bënte një ‘surprizë’ Bashës. Deklaratë kjo që erdhi pas akuzave të kryedemokratit, se Balla ka gisht në sasinë e parave të sekuestruara.
