Kryetari i Federatës së Futbollit të Kosovës (FFK), Fadil Vokrri – një futbollist dhe presidnet i shquar, i cili ishte një figurë kyçe në pranimin e Kosovës në UEFA ka ndërruar jetë sot në moshën 57-vjeçare. Vokrri ka ndërruar jetë pas një sulmi kardiak që kishte në mëngjesin e sotëm – ai nuk mund t’i përballonte sulmit dhe vdiq në QKUK.
Futbolli në Kosovë dhe në Evropë po mbajnë zi për presidentin e Federatës së Futbollit të Kosovës (FFK), Fadil Vokrri, i cili ka vdekur papritur në moshën 57 vjeçare.
E për vdekjen e tij ka reaguar edhe presidenti i shtëpisë së futbollit evropian, Aleksander Ceferin (UEFA).
“Ne jemi të tronditur dhe shumë të pikëlluar për vdekjen e Fadil Vokrrit,” tha presidenti i UEFA Aleksander Ceferin.
“Ai ishte një futbolist i shquar që kishte një karrierë të madhe dhe u bë President i futbollit të Kosovës. Fadili ishte figura kryesore në zhvillimin e futbollit të Kosovës dhe më meritori për pranimin e Kosovës në UEFA në vitin 2016.”
“Në emër të futbollit evropian, dëshiroj të shpreh ngushllime për familjen e tij, Federatën e Futbollit të Kosovës dhe komunitetin e futbollit të Kosovës”.
Vokrri u bë president i Federatës së Futbollit të Kosovës në vitin 2008 dhe u fitoi mandatin edhe dy herë, në vitin 2012 dhe 2016.
/GazetaBlic/
