Kohë gjyqesh te Flamurtari, që po mundohet të mbyllë gjithë çështjet që ka pezull, me shpresën se do të kualifikohet për në Europa League. “Sport Ekspres” mëson se ditët e fundit Flamurtari ka zhvilluar gjyqin kundër mesfushorit Yll Hoxha, i cili pretendonte se nuk është paguar tërësisht për sezonin 2015/16, kur luajti për Flamurtarin, duke qenë titullar fiks dhe duke shënuar 2 gola në 33 ndeshje kampionati.
Palët janë përballur në Dhomën Kombëtare të Zgjidhjes së Konflikteve, që ka marrë në shqyrtim kontratën e firmosur në gusht 2015 dhe pretendimin e Hoxhës se kishte marrë vetëm një pjesë të kontratës nga Flamurtari.
Në fakt, kontrata e Hoxhës shkonte në total për një sezon në shifrën e 60.000 eurove, por shifra është bruto, ndaj ndryshimi është i madh nga shifra neto, për shkak të taksave dhe detyrimeve të tjera ligjore.
Trupi gjykues, pasi shqyrtoi provat e paraqitura, vendosi t’i japë pjesërisht të drejtë futbollistit dhe njëkohësisht të drejtë Flamurtarit, që i detyrohet Yll Hoxhës 10.000 euro në total, por ndërkohë klubi vlonjat duhet të paguajë edhe shpenzimet e gjyqit, 1 milion lek të vjetra.
