Feronikeli ka barazuar për herë të katërt me radhë që kur në krye të skuadrës është emëruar trajneri Sulejman Starova.
Në kuadër të javës së 28-të, Feronikeli barazoi 0:0 me Lirinë dhe me 42 pikë të tubuara, gjasat për titull tani më i ka vetëm teorike.
“Meritonim të shënojmë fitore, sepse bëmë më shumë se rivali, që dukej se ishte i kënaqur edhe me një pikë. Ne bëmë presion, krijuam raste, por nuk arritëm të shënojmë gol. Pra, nuk jam i kënaqur me rezultatin, por jam i kënaqur me lojën që treguam”, ka thënë Starova pas ndeshjes për Super Sport.
“Do të vazhdojmë të evidentojmë të metat tona, do të punojmë kolektivisht në fazën ofensive, por edhe me individë të caktuar, sepse fundi i fundit është individi ai që mund të përcaktojë fatin e një ndeshjeje”, ka shtuar numri një i bankinës së Feronikelit. Në javën e ardhshme, skuadra e tij është mysafire e Dritës.
