Ministria e Arsimit dhe Shërbimi Botëror i Universitetit të Austrisë (ËUS Austria), kanë nënshkruar marrëveshje për administrimin e grantit për bashkëfinancimin e projektit “HERAS – Arsimi i Lartë, Hulumtimi dhe Shkenca e Aplikuar”.
Kostoja e këtij projekti është 2 milionë euro, nga të cilat Austria ka ndarë 1 milion e 800 mijë euro ndërsa ministria e Arsimit ka kontribuar me 200 mijë euro.
Ministri i Arsimit, Shyqiri Bytyqi tha se me nënshkrimin e marrëveshjes u janë hapur dyert studentëve, jo vetëm për studime por edhe për hulumtime.
“Marrëveshja e sotit ishte ta bëjmë pjesën zyrtare që na takon neve si MAShT. Kjo marrëveshje shton edhe më shumë bashkëpunimin me Austrinë. Kjo marrëveshje sot dhe ajo e mëhershme na jep mundësinë që të përkrahen studentët tanë në pjesën e doktoraturës dhe postdoktoraturës, si dhe në pjesën e hulumtimeve”, tha Bytyqi .
Ndërsa Veronica Nitsche, përfaqësuese e ËUS Austria, tha se përmes kësaj marrëveshjeje studentët do të përfitojnë më së shumti.
“Projekti quhet HERAS dhe do të thotë se arsimi i lartë, hulumtimi dhe shkencat e aplikuara ndërlidhen me rëndësinë e arsimit të lartë dhe tregun e punës. Ne jemi të lumtur të bashkëpunojmë me sistemin e arsimit të lartë përmes universiteteve dhe përmes Ministrisë së Arsimit. Çdo gjë ka të bëjë me bashkëpunimin. Po të mos ishte Ministria që t’i hapte dyert e bashkëpunimit, ne nuk do të mund të vinim”, tha ajo.
